ನಗಾರಿ ರೆಕಮಂಡೇಶನ್ 28: ‌ಸಂತಾ ಬಂತಾ ಡಾಟ್ ಕಾಮ್

ಒಂದು ಜನಾಂಗವನ್ನು ಗುರಿಯಾಗಿರಿಸಿಕೊಂಡ ಹಾಸ್ಯ  ಅದೇ ಜನಾಂಗದಲ್ಲಿ ಹುಟ್ಟಿ ಪ್ರಸಿದ್ಧಿಗೆ ಬಂದರೆ ಅದು ಆ ಜನಾಂಗದ ಹಾಸ್ಯ ಪ್ರಜ್ಞೆಗೆ ಸಾಕ್ಷಿಯಾಗುತ್ತದೆ. ಯಹೂದಿಗಳನ್ನು ಕುರಿತಾದ ಜೋಕುಗಳನ್ನು ಆ ಜನಾಂಗದ ಸದಸ್ಯರೇ ಜನಪ್ರಿಯಗೊಳಿಸಿದ್ದಾರೆ. ಖುದ್ದು ಸರ್ದಾರ್ ಆದ ಖುಶ್ವಂತ್ ಸಿಂಗ್ ಸರ್ದಾರ್ಜಿ ಜೋಕುಗಳನ್ನು ಜನಪ್ರಿಯಗೊಳಿಸಿದ್ದು ಭಾರತದ ಸಂದರ್ಭದಲ್ಲಿ ಮನನೀಯ ಉದಾಹರಣೆ.

ಸರ್ದಾರ್ಜಿ ಪಾತ್ರ ಪಂಜಾಬಿನ ಸಿಖ್ ಜನಾಂಗದ ಸದಸ್ಯರನ್ನು ಹೋಲುವುದಾದರೂ ಅದು ಸಾರ್ವತ್ರಿಕವಾಗಿ ಗುರುತಿಸಿಕೊಂಡಿರುವುದು ಎಲ್ಲಾ ಜನಾಂಗಗಳಲ್ಲೂ, ಎಲ್ಲರಲ್ಲೂ ಇರಬಹುದಾದ ಮೂರ್ಖತನ, ಎಡಬಿಡಂಗಿತನದ ಅಭಿವ್ಯಕ್ತಿಯಾಗಿ.

ಇಂತಹ ಸರ್ದಾರ್ ಜೋಕುಗಳ ದೊಡ್ಡ ಸಂಗ್ರಹವೇ ಇದೆ. ಹೊಸ ಜೋಕು ಹೊಸೆಯುವುದಕ್ಕೆ ಪಾತ್ರವೊಂದರ ಆವಶ್ಯಕತೆ ಕಂಡೊಡನೆ ಸರ್ದಾರ್ ಪ್ರತ್ಯಕ್ಷನಾಗುತ್ತಾನೆ.

ಸಂತಾ ಬಂತಾ ಡಾಟ್ ಕಾಮ್ ಸರ್ದಾರ್ ಜೋಕುಗಳಿಗೆ ದೇಶದಾದ್ಯಂತ ಪ್ರಸಿದ್ಧವಾದ ತಾಣ. ಪ್ರಚಲಿತ ವಿದ್ಯಮಾನಗಳನ್ನು ಕುರಿತ ಹರಿತವಾದ ವ್ಯಂಗ್ಯಚಿತ್ರಗಳು, ಅಗಾಧವಾದ ಜೋಕುಗಳು, ಸ್ಕ್ರೀನ್ ಸೇವರುಗಳು ಅಲ್ಲದೆ ಅನೇಕ ಸಲಕರಣೆಗಳನ್ನು ಹೊಂದಿರುವ ಸಂತಾ ಬಂತಾ ಡಾಟ್ ಕಾಮ್ ನ ವ್ಯಂಗ್ಯಚಿತ್ರದ ಸ್ಯಾಂಪಲ್ ಇಲ್ಲಿದೆ:

courtesy: santabanta.com

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 26 : ಸಿಲ್ಲಿ ಲಲ್ಲಿ

 

ಕನ್ನಡದ ಟಿವಿ ಚಾನಲುಗಳಲ್ಲು ಹಾಸ್ಯ ಧಾರಾವಾಹಿಯ ಜಮಾನ ಶುರುವಾಗಿದ್ದು ಯಾವ ಎಂದು ನೆನೆದರೆ ನೆನಪಾಗುವುದು ಪೀಚಲು ದೇಹದ ಗಂಡನನ್ನು ಬಾಲ್ಕನಿಯಿಂದ ಎಸೆಯುವ ದಢೂತಿ, ಘಟವಾಣಿ ಮಡದಿಯ ಕತೆಯ ‘ಪಾ.ಪ.ಪಾಂಡು’. ಕೌಟುಂಬಿಕ ಹಾಸ್ಯಕ್ಕೆ ಹೇಳಿ ಮಾಡಿಸಿದ ವಸ್ತುವಾದ ದಾಂಪತ್ಯವನ್ನು ಆಧಾರವಾಗಿಟ್ಟುಕೊಂಡು ಮೂಡಿಬಂದ ಈ ಧಾರಾವಾಹಿ ಬಹುಬೇಗ ಯಶಸ್ಸಿನ ಮೆಟ್ಟಿಲೇರಿತು. ಹಿರಿತೆರೆಯ ಹಾಸ್ಯದ ಪಾತ್ರಗಳಲ್ಲಿ ಪಳಗಿದ್ದ ಸಿಹಿ ಕಹಿ ಚಂದ್ರು ದಂಪತಿಗಳ ಫೈನಲ್ ಕಟ್ ಪ್ರೊಡಕ್ಷನ್‌ ನಿರ್ಮಾಣದ ಈ ಧಾರಾವಾಹಿಗೆ ಕತೆ, ಚಿತ್ರಕತೆ ಹಾಗೂ ಸಂಭಾಷಣೆ ಬರೆಯುತ್ತಿದ್ದವರು ಎಂ.ಎಸ್.ನರಸಿಂಹಮೂರ್ತಿ .

ಸೋಮವಾರದಿಂದ ಶುಕ್ರವಾರದವರೆಗೆ ಪ್ರಸಾರವಾಗುತ್ತಿದ್ದ ಧಾರಾವಾಹಿಗೆ ಪ್ರತಿದಿನ ಚಿತ್ರಕತೆ, ಸಂಭಾಷಣೆ ಬರೆಯುವುದು ಸುಲಭದ ಮಾತಲ್ಲ. ಸುಸಜ್ಜಿತವಾದ ಬರಹಗಾರರ ತಂಡವನ್ನೇ ಇಟ್ಟುಕೊಂಡು ಇಂಗ್ಲೀಷಿನ ‘ಸೈನ್‌ಫೆಲ್ಡ್’ನಂತಹ ಸಿಟ್‌ಕಾಮ್‌ಗಳು ವಾರಕ್ಕೊಂದು ಎಪಿಸೋಡ್ ನಿರ್ಮಿಸುತ್ತವೆ. ಪಾ.ಪ.ಪಾಂಡು ಯಶಸ್ಸಿನ ಶಿಖರವನ್ನೇರಿದ್ದ ಸಮಯದಲ್ಲೇ ಮುಖ್ಯಪಾತ್ರಧಾರಿ ಬದಲಾಗಿ ನಾನಾ ರೀತಿಯ ತೊಂದರೆಗಳಾದವು.

ಮೊದಲ ಯಶಸ್ಸು ಅತಿ ಅಪಾಯಕಾರಿಯಾದದ್ದು. ಅದರ ನೆರಳು ಮುಂದಿನ ಎಲ್ಲಾ ಪ್ರಯತ್ನಗಳ ಮೇಲೆ ಗಾಢವಾಗಿರುತ್ತದೆ. ಪಾ.ಪ ಪಾಂಡು ಯಶಸ್ಸಿನ ನಂತರ ಅದಕ್ಕಿಂತಲೂ ಹೆಚ್ಚಿನ ಮಟ್ಟದ ಜನಪ್ರಿಯತೆಯನ್ನು ಪಡೆದದ್ದು ಈ ಟಿವಿಯಲ್ಲಿಯೇ ಪ್ರಸಾರವಾದ, ಫೈನಲ್ ಕಟ್ ಪ್ರೊಡಕ್ಷನ್ನಿನದೇ ಕೊಡುಗೆಯಾದ ‘ಸಿಲ್ಲಿ ಲಲ್ಲಿ’. ಲವಲವಿಕೆಯ ಸಂಭಾಷಣೆ, ಐಕಾನಿಕ್ ಪಾತ್ರಗಳು, ಜಾಣ್ಮೆಯ ಚಿತ್ರಕತೆ ಇವುಗಳಿಂದ ವಿಠ್ಠಲ್‌ರಾವ್ ಸರ್ಜರಿ ಹಾಗೂ ಭರ್ಜರಿಯಲ್ಲಿ ಫೇಮಸ್ಸಾದಷ್ಟೇ ಸೀರಿಯಲ್ ಕೂಡ ಫೇಮಸ್ಸಾಯಿತು.

ಸಿಲ್ಲಿ ಲಲ್ಲಿ ಧಾರಾವಾಹಿಯ ಕೆಲವು ಎಪಿಸೋಡುಗಳನ್ನು ಆನ್ ಲೈನ್ ವೀಕ್ಷಿಸಲು ಇಲ್ಲಿ ಭೇಟಿ ನೀಡಬಹುದು. ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 25

ಒಂದು ಕಾಲದ ಅಮೇರಿಕಾದ ಅತಿ ಶ್ರೀಮಂತ ಸ್ಟ್ಯಾಂಡ್ ಅಪ್ ಕಮಿಡಿಯನ್ ಎಂಬ ಕೀರ್ತಿಗೆ ಪಾತ್ರವಾಗಿದ್ದ ಜೆರ್ರಿ ಸೈನ್ ಫೆಲ್ಡ್‌ನದ್ದು ದಿನನಿತ್ಯದ ಘಟನೆಗಳನ್ನು, ಸಣ್ಣ ಸಣ್ಣ ಸಂಗತಿಗಳನ್ನು ಹುಡುಕಿ ಅವುಗಳಲ್ಲಿ ಅಡಗಿರುವ ಅಸಂಬದ್ಧತೆ, ವಕ್ರತೆ, ವ್ಯಂಗ್ಯವನ್ನು ಹೊರತೆಗೆದು ನಗಿಸುವ ವಿಶಿಷ್ಟ ಹಾಸ್ಯ.

ಅಮೇರಿಕನ್ನರ ದೈನಂದಿನ ಬದುಕಿನಲ್ಲಿ ಅತಿ ಯಾಂತ್ರಿಕ ಭಾಗವಾದ ವಾಶಿಂಗ್ ಮಶೀನಿನೊಂದಿಗೆ ಕಳೆಯುವ ಸಮಯವನ್ನು ಕೂಡ ಹಾಸ್ಯದ ವಸ್ತುವನ್ನಾಗಿಸಿಕೊಳ್ಳಬಲ್ಲ. “ವಾಶಿಂಗ್ ಮಶೀನು ಬಟ್ಟೆಗಳ ಪಾಲಿಗೆ ನೈಟ್ ಪಾರ್ಟಿ ಇದ್ದ ಹಾಗೆ. ಬಟ್ಟೆಗಳಲ್ಲೆ ಒಟ್ಟಿಗೆ ಸೇರುವುದು ಅಲ್ಲಿ ಮಾತ್ರ. ಮಶೀನಿನ ಸ್ವಿಚ್ಚು ಅದುಮುತ್ತಿದ್ದ ಹಾಗೆ ಲೋಕವೇ ತಿರುಗಲು ಶುರುವಾಗುತ್ತೆ. ಶರ್ಟು ಸ್ಕರ್ಟಿನ ಜೊತೆ ಡ್ಯಾನ್ಸ್ ಮಾಡಲು ಶುರು ಮಾಡುತ್ತದೆ, ಪ್ಯಾಂಟು ಕೋಟಿನೊಂದಿಗೆ ಬೆಸೆದುಕೊಳ್ಳುತ್ತದೆ. ಈ ಮಳ್ಳನಂತಹ ಸಾಕ್ಸು ಮಾತ್ರ ತಾನು ತಪ್ಪಿಸಿಕೊಳ್ಳಲು ಇದೇ ಸುವರ್ಣಾವಕಾಶ ಎಂಬಂತೆ ಹಾರಿ ಹಾರಿ ಕಾಣದ ಜಾಗವನ್ನು ತಲುಪಿಕೊಳ್ಳುತ್ತೆ” ಎಂಬ ರೀತಿಯ ಹಾಸ್ಯವನ್ನು ಆತನಷ್ಟೇ ಮಾಡಬಲ್ಲ.

ಸ್ಟ್ಯಾಂಡ್ ಕಾಮಿಡಿಯಲ್ಲಿ ಹೆಸರುವಾಸಿಯಾದ ಸೈನ್‌ಫೆಲ್ಡ್ ಮುಂದೆ ಲ್ಯಾರಿ ಡೇವಿಡ್‌ನೊಡಗೂಡಿ ತನ್ನ ಹೆಸರಿನಲ್ಲೇ ಒಂದು ಕಾಮಿಡಿ ಶೋ ನಿರ್ಮಿಸಿದ. ತಾನೇ ನಿರ್ಮಾಪಕನಾಗಿ, ನಿರ್ದೇಶಕನಾಗಿ ನಿರ್ಮಿಸಿದ ‘ಸೈನ್ ಫೆಲ್ಡ್’ ಎನ್ನುವ ಟಿವಿ ಕಾರ್ಯಕ್ರಮದಲ್ಲಿ ತಾನೇ ಮುಖ್ಯ ಪಾತ್ರವನ್ನೂ ನಿರ್ಮಿಸಿದ. ತನ್ನ ಪಾತ್ರದಲ್ಲಿನ ಅಭಿನಯಕ್ಕಾಗಿ ಬಹುಮಾನ,ಮನ್ನಣೆಗಳನ್ನೂ ಗಳಿಸಿಕೊಂಡ. ಸೈನ್ ಫೆಲ್ಡ್ ಟಿವಿ ಕಾರ್ಯಕ್ರಮವು ಜನಪ್ರಿಯವಾಗಿ ಒಂಬತ್ತು ಸೀಸನ್‌ಗಳಷ್ಟು ಪ್ರಸಾರವಾಗಿದೆ.

ಸೈನ್ ಫೆಲ್ಡ್ ಸ್ಟ್ಯಾಂಡ್ ಅಪ್ ಕಾಮಿಡಿಯ ಒಂದು ತುಣುಕು ಈ ಸಂಚಿಕೆಯ ನಮ್ಮ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 24

ಅಂತರ್ಜಾಲವೆಂಬ ಸಾಗರದಲ್ಲಿ ಈಜಿ ಅಪರೂಪದ ದ್ವೀಪಗಳನ್ನು ತಲುಪಿಕೊಳ್ಳುವುದು ಪ್ರಯಾಸದ ಕೆಲಸ. ಒಮ್ಮೆ ಹಾಗೆ ಕಂಡ ನಗೆ ದ್ವೀಪಗಳನ್ನು ಸಹಮನಸ್ಕರಿಗೆ ಪರಿಚಯಿಸುವ ಘನೋದ್ದೇಶದಿಂದ ಸಾಮ್ರಾಟರು ತೆರೆದಿರುವ ಅಂಕಣವಿದು.

ಐವತ್ಮೂರು ವರ್ಷದ ಅಮೇರಿಕಾದ ಕಮಿಡಿಯನ್ ಬಿಲ್ ಮಹರ್ ಒಳ್ಳೆಯ ರಾಜಕೀಯ ವಿಶ್ಲೇಷಕನೂ ಹೌದು. ಇತ್ತೀಚೆಗೆ ಎಚ್.ಬಿ.ಒ ಚಾನೆಲ್ಲಿಗಾಗಿ ರಿಯಲ್ ಟೈಮ್ ಎನ್ನುವ ಟಿವಿ ಕಾರ್ಯಕ್ರಮ ಮಾಡಿಕೊಡುತ್ತಿರುವ ಮಹರ್, ಅದರಲ್ಲಿ ಸಮಕಾಲೀನ ರಾಜಕೀಯ ವಿದ್ಯಮಾನಗಳ ಬಗ್ಗೆ ವಿಶ್ಲೇಷಣೆ ಹಾಗೂ ವಿಡಂಬನೆ ಮಾಡುತ್ತಾನೆ.

೧೯೫೬ರ ಜನವರಿ ಇಪ್ಪತ್ತರಂದು ಅಮೇರಿಕಾದಲ್ಲಿ ಜನಿಸಿದ ಈತ ಸ್ಟ್ಡ್ಯಾಂಡ್ ಅಪ್ ಕಾಮಿಡಿ ಮೂಲಕ ಗುರುತಿಸಿಕೊಂಡವನು. ಅನಂತರ ಅನೇಕ ಹಾಸ್ಯಪ್ರಧಾನವಾದ ಟಿವಿ ಟಾಕ್ ಶೋಗಳನ್ನು ನಡೆಸಿಕೊಟ್ಟ. ಸಾಮಾಜಿಕ ಹಾಗೂ ರಾಜಕೀಯ ವಿದ್ಯಮಾನಗಳ ವಿಡಂಬನೆಯನ್ನು ಮಾಡುವ ‘ಪೊಲಿಟಿಕಲಿ ಇನ್ ಕರೆಕ್ಟ್’ ಎಂಬ ಟಾಕ್ ಶೋವನ್ನು ಮೊದಲಿಗೆ ಕಾಮಿಡಿ ಸೆಂಟ್ರಲ್ ವಾಹಿನಿಗಾಗಿ ಅನಂತರ ಎಬಿಸಿಗಾಗಿ ನಡೆಸಿಕೊಡುತ್ತಿದ್ದ.

ತನ್ನ ಹರಿತವಾದ ರಾಜಕೀಯ ವಿಡಂಬನೆಗಳಿಗೆ ಹೆಸರಾಗಿರುವ ಈತ ಸ್ಪಷ್ಟವಾದ ರಾಜಕೀಯ ನಿಲುವುಗಳನ್ನೂ ಹೊಂದಿದ್ದಾನೆ. ಅಮೇರಿಕಾದ ಎಡಪಂಥೀಯ ರಾಜಕೀಯ ಪಕ್ಷವನ್ನು ಈತ ಬೆಂಬಲಿಸುತ್ತಾನೆ. ಮರಿಜುವಾನವನ್ನು ಸಕ್ರಮಗೊಳಿಸುವುದರ ಪರವಾಗಿ ಈತ ಬೆಂಬಲ ನೀಡಿದ್ದಾನೆ. ಪ್ರಾಣಿಗಳ ಹಕ್ಕು ರಕ್ಷಣೆಗೆ ಒತ್ತಾಯಿಸುವ ಪೀಟಾ ಸಂಸ್ಥೆಗೆ ಬೆಂಬಲಿಸಿದ್ದಾನೆ. ಸಲಿಂಗಿಗಳ ಹಕ್ಕು ರಕ್ಷಣೆಯ ಹೋರಾಟಕ್ಕೆ ಈತನ ಬೆಂಬಲವಿದೆ.

೨೦೦೮ರಲ್ಲಿ ಸ್ಥಾಪಿತ ಧರ್ಮಗಳನ್ನು ಲೇವಡಿ ಮಾಡುವ, ಮೂಢ ನಂಬಿಕೆಗಳನ್ನು, ಧಾರ್ಮಿಕ ಶ್ರದ್ಧೆಗಳನ್ನು ವಿಡಂಬನೆಗೆ ಒಳಪಡಿಸುವ ಈತನ ಚಿತ್ರ ‘ರಿಲಿಜುಲಸ್’ ಬಿಡುಗಡೆಯಾಗಿತ್ತು. Religion ಹಾಗೂ ridiculous ಪದಗಳ ಸಂಯೋಗದಿಂದ ಹುಟ್ಟಿದ ಹೊಸ ಪದದವನ್ನು ಸಿನೆಮಾ ಹೆಸರಾಗಿ ಬಳಸಲಾಗಿದೆ. ಇದರಲ್ಲಿ ಮಹರ್ ಜಗತ್ತಿನ ಪ್ರಮುಖ ಧರ್ಮಗಳನ್ನು, ಅವರ ಧಾರ್ಮಿಕ ನಂಬಿಕೆಗಳನ್ನು ತೀಕ್ಷ್ಣವಾದ ಗೇಲಿಗೆ ಒಳಪಡಿಸಿದ್ದಾನೆ.

ಈತನ ಸ್ಡ್ಯಾಂಡ್ ಅಪ್ ಕಾಮಿಡಿಯ ತುಣುಕನ್ನು ಸಾಮ್ರಾಟರು ಈ ಸಂಚಿಕೆಯಲ್ಲಿ ರೆಕಮಂಡ್ ಮಾಡುತ್ತಿದ್ದಾರೆ.

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್! ಹೇಗಿದೆ ಎಂದು ತಿಳಿಸುತ್ತೀರಲ್ಲ?

ನಗಾರಿ ರೆಕಮಂಡೇಶನ್ 18 – have a chuckle

ಹೌದು, ಇವು ನಗೆ ನಗಾರಿಯ ಶಿಫಾರಸ್ಸುಗಳು. ಅಂತರ್ಜಾಲದ ಅಂಗಳದಲ್ಲಿ ನೀವು ನೋಡಲೇ ಬೇಕಾದ ಹಾಸ್ಯದ ಬುಗ್ಗೆಗಳು. ಪ್ರತಿ ಸಂಚಿಕೆಯಲ್ಲೂ ಒಂದೊಂದು ಚಿಲುಮೆಯೆಡೆಗೆ ಕರೆದೊಯ್ಯುವ ಕೆಲಸ ಮಾಡಲಿದ್ದಾರೆ ನಗೆ ಸಾಮ್ರಾಟ್.

…………………………………….

 

‘ಒಳ್ಳೆಯದು ಯಾವ ದಿಕ್ಕಿನಿಂದ ಬಂದರೂ ನಿನ್ನ ಮನಸ್ಸನ್ನು ತೆರೆದು ಸ್ವೀಕರಿಸು’ ಎಂದಿದ್ದಾರೆ ನಮ್ಮ ಹಿರಿಯರು. ಹಾಗೆಯೇ ಖುಶಿಯಾಗಿರುವುದಕ್ಕೆ, ನಗುನಗುತ್ತಿರುವುದಕ್ಕೆ ಅವಕಾಶ ಎಲ್ಲಿಂದ ಸಿಕ್ಕರೂ ನಾವದನ್ನು ಮುಕ್ತವಾಗಿ ಸ್ವಾಗತಿಸಬೇಕು. ದಿನ ಪತ್ರಿಕೆಗಳಲ್ಲಿ, ಮ್ಯಾಗಝೀನುಗಳಲ್ಲಿ, ಎಸೆಮ್ಮೆಸ್ಸುಗಳಲ್ಲಿ ತಿರುಗಿ ತಿರುಗಿ ದಣಿಸು ಬಸವಳಿದ ಜೋಕುಗಳಿಗೆ ಸ್ವಲ್ಪ ಕಾಲ ರೆಸ್ಟ್ ಕೊಟ್ಟು ಒಂದಷ್ಟು ಹೊಸ ಬಗೆಯ, ಎಲ್ಲೂ ಕೇಳಿರದ(ಹಾಗೆ ಭಾವಿಸಬಹುದಾದ) ಜೋಕುಗಳನ್ನು ಓದುವುದಕ್ಕೆ ಇಲ್ಲೊಂದು ಬ್ಲಾಗಿದೆ.

ದಿನಕ್ಕೊಂದು ಜೋಕು ಎನ್ನುವ ಈ ಬ್ಲಾಗ್ ಸ್ಪಾಟಿಗೆ ಭೇಟಿಯಿತ್ತರೆ ಪ್ರತಿದಿನವನ್ನು ನಗುವಿನೊಂದಿಗೆ ಶುರು ಮಾಡಬಹುದು ಎನ್ನುತ್ತಾರೆ ಇದರ ಮಾಲೀಕರು. ಇದರಲ್ಲಿನ ಜೋಕುಗಳ ಸ್ಯಾಂಪಲ್ ಒಂದನ್ನು ಇಲ್ಲಿ ಕೊಟ್ಟಿದ್ದೇವೆ.

A husband and wife were at a party chatting with some friends when the subject of marriage counseling came up.

"Oh, we’ll never need that. My wife and I have a great relationship," the husband explained. "She was a communications major in college and I majored in theatre arts."

He continued, "She communicates well and I act like I’m listening."

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ಸ್ 17

ಹೌದು, ಇದು ನಗೆ ನಗಾರಿಯ ಶಿಫಾರಸ್ಸುಗಳು. ಅಂತರ್ಜಾಲದ ಅಂಗಳದಲ್ಲಿ ನೀವು ನೋಡಲೇ ಬೇಕಾದ ಹಾಸ್ಯದ ಬುಗ್ಗೆಗಳು. ಪ್ರತಿ ಸಂಚಿಕೆಯಲ್ಲೂ ಒಂದೊಂದು ಚಿಲುಮೆಯೆಡೆಗೆ ಕರೆದೊಯ್ಯುವ ಕೆಲಸ ಮಾಡಲಿದ್ದಾರೆ ನಗೆ ಸಾಮ್ರಾಟ್.

……………………………………

ಟಿವಿ ಶೋಗಳು ಹಾಗೂ ಶೋ ಆಂಕರ್‌ಗಳು ಅಮೇರಿಕಾದ ಟಿವಿ ಜಗತ್ತಿನಲ್ಲಿ ಸ್ಥಾಪಿಸಿರುವ ಸ್ಥಾನವು ಬಹಳ ಪ್ರಮುಖವಾದದ್ದು. ಒಬ್ಬೊಬ್ಬ ಟಿವಿ ಆಂಕರ್ ಪ್ರಸಿದ್ಧಿಯಲ್ಲಿ ಸಹ ಹಾಲಿವುಡ್ ಹಿರೋನ ಎತ್ತರ ಏರಿರುವುದು, ಅವರೂ ಸಹ ಸೆಲೆಬ್ರಿಟಿಗಳಾಗಿರುವುದು ಕಂಡು ಬರುತ್ತದೆ. ಭಾರತದ ಟಿವಿ ಚಾನೆಲ್ಲುಗಳಲ್ಲೂ ಸಹ ಇಂತಹ ಕೆಲವು ಉದಾಹರಣೆಗಳಿವೆಯಾದರೂ ಆಸಕ್ತರು ಇದನ್ನೇ ಉದ್ಯೋಗವಾಗಿ ಪಡೆಯುವಷ್ಟರ ಮಟ್ಟಿಗೆ ಈ ಸಂಪ್ರದಾಯವಿನ್ನೂ ಬೆಳೆದಿಲ್ಲ.

ಐಬಿಎಸ್ ಬ್ರಾಡ್‌ಕಾಸ್ಟಿಂಗ್ ಕಂಪೆನಿಗಾಗಿ ಲೇಟ್ ಶೋ ಎಂಬ ಹೆಸರಿನ ತಡರಾತ್ರಿಯ ಕಾರ್ಯಕ್ರಮವನ್ನು ಕಳೆದ ಹದಿನೈದು ವರ್ಷಗಳಿಂದ ನಡೆಸಿಕೊಂಡು ಬರುತ್ತಿರುವ ಡೇವಿಡ್ ಮೈಕೇಲ್ ಲೆಟರ್‌ಮನ್ ಅಮೇರಿಕಾದಲ್ಲಿ ಹೆಸರುವಾಸಿ. ಈತನ ಟಾಕ್ ಶೋನಲ್ಲಿ ಕಾಮಿಡಿಯೇ ಪ್ರಧಾನವಾದರೂ ಒಂದು ಸಾಂಪ್ರದಾಯಿಕ ಟಿವಿ ಕಾರ್ಯಕ್ರಮಕ್ಕೆ ಬೇಕಾದ ಅಂಶಗಳನ್ನೆಲ್ಲಾ ಈ ಕಾರ್ಯಕ್ರಮ ಹೊಂದಿರುತ್ತದೆ.

ಲೆಟರ್‌ಮನ್‌ನ ಲೇಟ್ ನೈಟ್ ಶೋಗೆ ಭಾರತದ ಮಾಜಿ ವಿಶ್ವ ಸುಂದರಿ ಐಶ್ವರ್ಯ ರೈ ಆಹ್ವಾನಿತಳಾಗಿದ್ದಳು. ಆ ಸಂದರ್ಶನದಲ್ಲಿ ಲೆಟರ್‌ಮನ್‌ನ ಮೊನಚಾದ, ಕಾಲೆಳೆಯುವ ಪ್ರಶ್ನೆಗಳಿಗೆ ಐಶ್ವರ್ಯ ಸಹ ಪ್ರಖರವಾಗಿಯೇ ಉತ್ತರಿಸಿದಳು.

ಭಾರತದ ಬಗ್ಗೆ ತನ್ನ ಅಜ್ಞಾನವನ್ನು ಪ್ರದರ್ಶಿಸುತ್ತಾ ಲೆಟರ್‌ಮನ್ ಐಶ್ವರ್ಯಳನ್ನು ಹೀಗೆ ಪ್ರಶ್ನಿಸುತ್ತಾನೆ, “ನಿಮ್ಮ ದೇಶದಲ್ಲಿ ಮಕ್ಕಳು ತಂದೆ ತಾಯಿಯ ಜೊತೆಗೇ ಇರುತ್ತಾರಾ?”
ಅದಕ್ಕೆ ಐಶ್ವರ್ಯ ಕೊಡುವ ಮಾರ್ಮಿಕ ಉತ್ತರ, “ಹೌದು, ನಮ್ಮ ದೇಶದಲ್ಲಿ ತಮ್ಮ ಅಪ್ಪ ಅಮ್ಮನೊಂದಿಗೆ ಮಾತಾಡಲು, ಊಟ ಮಾಡಲು ಮಕ್ಕಳು ಅಪಾಯಿಂಟ್ ಮೆಂಟ್ ಪಡೆಯುವ ಆವಶ್ಯಕತೆಯಿಲ್ಲ!”

ಈ ಅಪರೂಪದ ಸಂದರ್ಶನ ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗೆ ನಗಾರಿ ರೆಕಮಂಡೇಶನ್ 16

ಹೌದು, ಇದು ನಗೆ ನಗಾರಿಯ ಶಿಫಾರಸ್ಸುಗಳು. ಅಂತರ್ಜಾಲದ ಅಂಗಳದಲ್ಲಿ ನೀವು ನೋಡಲೇ ಬೇಕಾದ ಹಾಸ್ಯದ ಬುಗ್ಗೆಗಳು. ಪ್ರತಿ ಸಂಚಿಕೆಯಲ್ಲೂ ಒಂದೊಂದು ಚಿಲುಮೆಯೆಡೆಗೆ ಕರೆದೊಯ್ಯುವ ಕೆಲಸ ಮಾಡಲಿದ್ದಾರೆ ನಗೆ ಸಾಮ್ರಾಟ್.

…………………………………….

ರಾಜಕೀಯ ವಿಡಂಬನೆ ಎನ್ನುವುದು ಮಾಧ್ಯಮ ರಂಗದ ಮೊನಚಾದ ಅಸ್ತ್ರ. ನಾಡನ್ನು ಆಳುವವರನ್ನು ಚುಚ್ಚುವ ಸೂಕ್ತವಾದ ಸೂಜಿ. ತಪ್ಪು ಮಾಡಿದವರನ್ನು ಗೇಲಿ ಮಾಡುವುದು, ಅವರ ಅಪರಾಧಕ್ಕಾಗಿ ಬೆಲೆ ತೆರೆವಂತೆ ಮಾಡುವುದು ಸಹ ಅತ್ಯಂತ ಜವಾಬ್ದಾರಿಯುತ ಪತ್ರಿಕೋದ್ಯಮವೇ. ಕನ್ನಡದ ಪತ್ರಿಕೆಗಳಲ್ಲಿ ರಾಜಕೀಯ ವಿಡಂಬನೆಗೆ ಕೊರತೆಯಿಲ್ಲ. ಪ್ರತಿದಿನ ತಪ್ಪದೆ ಪ್ರಕಟವಾಗುವ ವ್ಯಂಗ್ಯಚಿತ್ರಗಳು ಆಳುವವರನ್ನು, ಅವರ ನೀತಿಗಳನ್ನು, ವರ್ತನೆಗಳನ್ನು ಲೇವಡಿ ಮಾಡುವುದನ್ನು ನಾವು ಕಾಣುತ್ತೇವೆ. ಟೈಮ್ಸಾಫಿಂಡಿಯಾದ ಟ್ರೇಡ್ ಮಾರ್ಕ್ ಆದ ಆರ್.ಕೆ.ಲಕ್ಷ್ಮಣ್ ಕಾರ್ಟೂನುಗಳಿಂದ ಹಿಡಿದು ಪ್ರಜಾವಾಣಿಯ ಮಹಮ್ಮದ್‌ರ ಕಾರ್ಟೂನುಗಳವರೆಗೆ ನಮ್ಮ ನಾಡಿನ ರಾಜಕೀಯವನ್ನು ಸೀಳಿ ನೋಡುವ, ಹುಳುಕನ್ನು ಬಯಲು ಮಾಡುವ ಹುಮ್ಮಸ್ಸು ಕಾಣುತ್ತದೆ.

ಆದರೆ ಟಿವಿ ಮಾಧ್ಯಮದಲ್ಲಿ ಈ ಶೈಲಿಯನ್ನು ಸಮರ್ಪಕವಾಗಿ ಬಳಸಿಕೊಂಡ ಉದಾಹರಣೆಗಳು ನಮಗೆ ಕಾಣುವುದಿಲ್ಲ. ಅಗ್ಗದ ಮಿಮಿಕ್ರಿಯನ್ನೇ ರಾಜಕೀಯ ವಿಡಂಬನೆ ಎಂದು ತಿಳಿದು ಹಾಸ್ಯವನ್ನು ಒದಗಿಸುವವರೇ ಹಾಸ್ಯಾಸ್ಪದರಾಗುತ್ತಿರುವುದು ನಿಜಕ್ಕೂ ಒಳ್ಳೆಯ ಜೋಕು! ಹಾಗಾದರೆ ರಾಜಕೀಯ ವಿಡಂಬನೆಯನ್ನು ಟಿವಿ ಮಾಧ್ಯಮದಲ್ಲಿ ಸಮರ್ಪಕವಾಗಿ ಬಳಸಿಕೊಳ್ಳುವುದು ಎಂದರೆ ಹೇಗೆ ಎಂಬುದಕ್ಕೆ ಒಂದು ಉದಾಹರಣೆ ಕೊಡಬೇಕಲ್ಲವೇ?

ಈತ ಸ್ಟೀಫನ್ ಟೈರನ್ ಕೋಲ್ಬರ್ಟ್ (Stephen Tyrone Colbert ), ತನ್ನ ಹೆಸರನ್ನು ಕೋಲ್ಬರ್ಟ್ ಎನ್ನಬೇಡಿ, ಕೋಲ್‌ಬೇರ್ ಎನ್ನಿ ಎಂದು ಹೇಳುವ ಈತ ‘ದಿ ಕೊಲ್‌ಬೇರ್ ರಿಪೋರ್ಟ್’ ಎಂಬ ಟಿವಿ ಕಾರ್ಯಕ್ರಮವನ್ನು ಕಾಮಿಡಿ ಸೆಂಟ್ರಲ್ ಟಿವಿ ವಾಹಿನಿಗೆ ಕಳೆದ ಮೂರು ವರ್ಷಗಳಿಂದ ನಡೆಸಿ ಕೊಡುತ್ತಿದ್ದಾನೆ. ಈತ ಕಾರ್ಯಕ್ರಮ ಕೇವಲ ಅರ್ಧ ಗಂಟೆಯದಾದರೂ ಅದು ವಿಶಿಷ್ಟವಾಗಿರುತ್ತದೆ, ವೈವಿಧ್ಯಮಯವಾಗಿರುತ್ತದೆ. ಪ್ರತಿ ಕಾರ್ಯಕ್ರಮದಲ್ಲಿ ಒಬ್ಬ ಅತಿಥಿಯನ್ನು ಸಂದರ್ಶಿಸಲಾಗುತ್ತದೆ. ಈತನ ನಿರೂಪಣೆಯಲ್ಲೂ ವಿಶಿಷ್ಟತೆ ಇದೆ. ಅಮೇರಿಕಾದಲ್ಲಿ ತನ್ನ ಪೂರ್ವಾಗ್ರಹ ಪೀಡಿತ ವರದಿಗಾರಿಕೆಗೆ ಕುಖ್ಯಾತಿ ಹೊಂದಿರುವ ಫಾಕ್ಸ್ ನ್ಯೂಸ್ ಚಾನೆಲ್ಲಿನ ಆಂಕರ್ ಬಿಲ್ ಓ ರೆಲಿಯ ಸ್ವಕೇಂದ್ರಿತ, ಆಕ್ರಮಣಕಾರಿ, ಅಹಂಕಾರ ಭರಿತ ಶೈಲಿಯನ್ನು ಗೇಲಿ ಮಾಡುವುದಕ್ಕಾಗಿ ಈತ ಅದೇ ಶೈಲಿಯನ್ನು ವೈಭವೀಕರಿಸಿ ಅಳವಡಿಸಿಕೊಂಡಿದ್ದಾನೆ.

ಈತನ ರಾಜಕೀಯ ವಿಡಂಬನೆಯ ಹರಿತತೆಯನ್ನು ತಿಳಿಯುವುದಕ್ಕೆ ಈತ ೨೦೦೬ರ ಶ್ವೇತ ಭವನದ ಮಾಧ್ಯಮ ಪ್ರತಿನಿಧಿಗಳ ಸಂಘದ ವಾರ್ಷಿಕ ಭೇಟಿಯಲ್ಲಿ ಅಂದಿನ ಅಧ್ಯಕ್ಷ ಜಾರ್ಜ್.ಡಬ್ಲು.ಬುಶ್ ಎದುರಲ್ಲೇ ಆತನ ಸಣ್ಣತನಗಳನ್ನು, ತಪ್ಪು ನಿರ್ಧಾರಗಳನ್ನು, ಆಡಳಿತದ ಹುಳುಕುಗಳನ್ನು ಲೇವಡಿ ಮಾಡಿದ ಈ ಕ್ಲಿಪ್ಪನ್ನು ನೀವು ನೋಡಬೇಕು.

ಈತನ ‘ದಿ ಕೋಲ್‌ಬೇರ್ ರಿಪೋರ್ಟ್’ ಕಾರ್ಯಕ್ರಮವನ್ನು ಅಂತರ್ಜಾಲದಲ್ಲಿ ವೀಕ್ಷಿಸಲು ಇಲ್ಲಿ ಭೇಟಿ ನೀಡಿ.

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೆಶನ್ 14

ಹೌದು, ಇದು ನಗೆ ನಗಾರಿಯ ಶಿಫಾರಸ್ಸುಗಳು. ಅಂತರ್ಜಾಲದ ಅಂಗಳದಲ್ಲಿ ನೀವು ನೋಡಲೇ ಬೇಕಾದ ಹಾಸ್ಯದ ಬುಗ್ಗೆಗಳು. ವಾರ ವಾರವೂ ಒಂದೊಂದು ಚಿಲುಮೆಯೆಡೆಗೆ ಕರೆದೊಯ್ಯುವ ಕೆಲಸ ಮಾಡಲಿದ್ದಾರೆ ನಗೆ ಸಾಮ್ರಾಟ್.

…………………………………….

ನಮ್ಮ ದೇಶದ ಪ್ರಧಾನಿಯವರ ಬ್ಲಾಗಿದು. ಹ್ಹ! ಆಶ್ಚರ್ಯ ಚಕಿತರಾಗಿ ಉಸಿರು ಗಂಟಲಲ್ಲಿ ಸಿಕ್ಕಿಸಿಕೊಂಡು ಒದ್ದಾಡುವ ಮುನ್ನ ಸ್ವಲ್ಪ ಗಮನಿಸಿ. ಇದು ನಮ್ಮ ದೇಶದ ಪ್ರಧಾನಿಯವರ ಶೇ ನೂರರಷ್ಟು ಅನಧಿಕೃತವಾದ ಬ್ಲಾಗು.

ಬ್ಲಾಗಿನ ಬಗ್ಗೆ ಪರಿಚಯ ನೀಡುತ್ತಾ ಪ್ರಧಾನಿಯವರು ಹೀಗೆ ಬರೆಯುತ್ತಾರೆ: “ನಾನು ಕೆಲ ಸಮಯದ ಹಿಂದೆ ಅಟಲ್ ಬಿಹಾರಿ ವಾಜಪೇಯಿ ಆಗಿದ್ದೆ. ಈಗ ಮನಮೋಹನನಾಗಿರುವೆ. ಪ್ರಸ್ತುತ ಮನಮೋಹನನಾಗಿರುವೆನಾದರೂ ಆಗಾಗ ಸೋನಿಯಾ ಆಗುತ್ತಿರುತ್ತೇನೆ. ಈ ದೇಶದ ರಾಜಕೀಯದಲ್ಲಿ ಸದಾ ಬದಲಾಗುವ ಶಾಶ್ವತ ಸ್ಥಾನ ನನ್ನದು. ಶೀಘ್ರದಲ್ಲಿ ನಾನು ರಾಹುಲನಾಗಬಹುದು, ಅಡ್ವಾಣಿಯಾಗಬಹುದು ಇಲ್ಲವೇ ಮೋದಿ. ಇಲ್ಲವಾದರೆ ನಾನು ಲಾಲೂ ಆಗಬಹುದು. ಆ ದಿನ ದೇವರೇ ಭಾರತವನ್ನು ಕಾಪಾಡಬೇಕು. ಒಂದು ವೇಳೆ ನಾನು ಮಾಯಾವತಿಯಾದರೆ ನನಗೆ ಸರ್ಜರಿ ಆವಶ್ಯಕವಾಗಿ ಬೇಕು…’’

ಕನ್ನಡದಲ್ಲಿರುವ ಹಲವು ಬೊಗಳೆ ಬ್ಲಾಗುಗಳ ಹಾಗೆಯೇ ಇದು ಏಕ ಸದಸ್ಯರ ಗುಂಪು ನಡೆಸುತ್ತಿರುವ ಬೊಗಳೆ ಬ್ಲಾಗು. ಬೊಗಳೆ ಇಂಗ್ಲೀಷಿನದಾದ ತಕ್ಷಣ ಅದಕ್ಕೆ ಇಡೀ ದೇಶದ ವಿಷಯಗಳನ್ನು ಜೀರ್ಣಿಸಿಕೊಳ್ಳಲು ಸಾಧ್ಯ ಎಂಬುದು ಅಪ್ಪಟ ಮಿಥ್ ಎಂದು ಸಾಮ್ರಾಟರು ಹೇಳುತ್ತಿದ್ದಾರಾದರೂ ಈ ಬಾರಿ ರೆಕಮಂಡ್ ಮಾಡಲು ಇದಕ್ಕಿಂತ ಉತ್ತಮ ಆಯ್ಕೆ ಇರದುದರಿಂದ ಈ ಬ್ಲಾಗನ್ನು ರೆಕಮಂಡ್ ಮಾಡಲು ಸೂಚಿಸಿದ್ದಾರೆ!

ನಗಾರಿ ರೆಕಮಂಡೆಶನ್ 13

ಹೌದು, ಇದು ನಗೆ ನಗಾರಿಯ ಶಿಫಾರಸ್ಸುಗಳು. ಅಂತರ್ಜಾಲದ ಅಂಗಳದಲ್ಲಿ ನೀವು ನೋಡಲೇ ಬೇಕಾದ ಹಾಸ್ಯದ ಬುಗ್ಗೆಗಳು. ವಾರ ವಾರವೂ ಒಂದೊಂದು ಚಿಲುಮೆಯೆಡೆಗೆ ಕರೆದೊಯ್ಯುವ ಕೆಲಸ ಮಾಡಲಿದ್ದಾರೆ ನಗೆ ಸಾಮ್ರಾಟ್.

…………………………………….

ಎಲ್ಲವನ್ನೂ ಎಲ್ಲಾ ವರ್ಗದರಿಗೂ ಕೊಡುವ ಉದ್ದೇಶದಿಂದ ಕನ್ನಡದಲ್ಲಿ ಹಲವಾರು ಪೋರ್ಟಲುಗಳು, ಅಂತರ್ಜಾಲ ಪತ್ರಿಕೆಗಳು,ವೆಬ್ ಸೈಟುಗಳು ಕೆಲಸ ಮಾಡುತ್ತಲಿವೆ. ಅಡುಗೆ ಮಾಡುವ ವಿಧಾನದಿಂದ ಹಿಡಿದು ಆಧ್ಯಾತ್ಮ ಸಾಧನೆಯವರೆಗೆ ಎಲ್ಲಾ ವಿಷಯಗಳನ್ನು ಒಳಗೊಳ್ಳುವಂತೆ ಅವನ್ನು ರೂಪಿಸಿರಲಾಗುತ್ತದೆ. ನಾವು ಪೌರಾತ್ಯರ ಅಭಿರುಚಿಯೇ ಹೀಗೇನೋ, ಒಂದೇ ಸಿನೆಮಾದಲ್ಲಿ ಕಾಮಿಡಿ, ಟ್ರ್ಯಾಜಿಡಿ, ಎಮೋಶನ್ನು, ಫೈಟು, ಸೀನರಿ ಎಲ್ಲವೂ ಇರಬೇಕು ಎಂದು ಬಯಸುವವರು ನಾವು ಹೀಗಾಗಿ ನಮಗೆ ಇಂಥಾ ಫುಲ್ ಮೀಲ್ಸ್‌ಗಳೇ ಇಷ್ಟವಾಗುತ್ತವೆ ಹಾಗೂ ಆಪ್ತವಾಗುತ್ತವೆ. ಒಂದು ವಿಷಯದ ಬಗ್ಗೆ ಸಮಗ್ರವಾಗಿ ಅಧ್ಯಯನ ಮಾಡುವುದು ನಮಗೆ ಅಷ್ಟು ಒಗ್ಗುವುದಿಲ್ಲ.

ಕನ್ನಡದ ಮೊದಲ ಅಂತರ್ಜಾಲ ಪತ್ರಿಕೆ ಎಂಬ ಹಿರಿಮೆಯನ್ನು ಪಡೆದದ್ದು ಯು.ಬಿ.ಪವನಜರ ವಿಶ್ವಕನ್ನಡ ತಾಣ.ಈ ತಾಣ ಕನ್ನಡಿಗರು ಬಯಸುವ ಪ್ರತಿಯೊಂದನ್ನೂ ಉಣಬಡಿಸುತ್ತದೆ. ಜೊತೆಗೆ ಕನ್ನಡದಲ್ಲಿ ಬೇರೆಲ್ಲೂ ಲಭ್ಯವಿಲ್ಲದ ತಾಂತ್ರಿಕ ಮಾಹಿತಿಯೂ ಇಲ್ಲಿ ಲಭ್ಯವಿದೆ. ಹಾಸ್ಯದ ಸಂಗ್ರಹದಲ್ಲೂ ವಿಶ್ವ ಕನ್ನಡ ಹಿಂದೆ ಬಿದ್ದಿಲ್ಲ. ತುಂಬಾ ಮೊನಚಾದ, ಸದಭಿರುಚಿಯ ಹಾಸ್ಯಕ್ಕಾಗಿ ಈ ತಾಣವನ್ನು ಸಂದರ್ಶಿಸಬಹುದು. ವಿಶ್ವಕನ್ನಡದ ಹಾಸ್ಯದ ರಸದೌತಣದ ಸ್ಯಾಂಪಲ್ ನಿಮಗಾಗಿ:

ತರಲೆ ಗಣಿತ

ಕ್ಯಾಪ್ಟನ್ ಕುಕ್ ೫ ಸಲ ಸಮುದ್ರಯಾನ ಮಾಡಿದನು. ಅದರಲ್ಲಿ ಒಂದು ಸಮುದ್ರಯಾನದಲ್ಲಿ ಸತ್ತನು. ಎಷ್ಟನೇ ಸಮುದ್ರಯಾನದಲ್ಲಿ ಆತ ಸತ್ತನು?
(ಕ) ೧ನೇ ಸಮುದ್ರಯಾನದಲ್ಲಿ.
(ಚ) ೫ನೇ ಸಮುದ್ರಯಾನದಲ್ಲಿ.
(ಟ) ೬ನೇ ಸಮುದ್ರಯಾನದಲ್ಲಿ.
(ತ) ಯಾವುದೂ ಅಲ್ಲ.

ನಗಾರಿ ರೆಕಮಂಡೇಶನ್ 9

ಹೌದು, ಇದು ನಗೆ ನಗಾರಿಯ ಶಿಫಾರಸ್ಸುಗಳು. ಅಂತರ್ಜಾಲದ ಅಂಗಳದಲ್ಲಿ ನೀವು ನೋಡಲೇ ಬೇಕಾದ ಹಾಸ್ಯದ ಬುಗ್ಗೆಗಳು. ವಾರ ವಾರವೂ ಒಂದೊಂದು ಚಿಲುಮೆಯೆಡೆಗೆ ಕರೆದೊಯ್ಯುವ ಕೆಲಸ ಮಾಡಲಿದ್ದಾರೆ ನಗೆ ಸಾಮ್ರಾಟ್.

………………………………………………………………

ಮಾಸ್ಟರ್ ಹಿರಣ್ಣಯ್ಯ ನಮಗೆ ಇಷ್ಟವಾಗುವುದು ಅವರು ನಮ್ಮ ಪರವಾಗಿ ಪಟ್ಟಭದ್ರರನ್ನು, ಭ್ರಷ್ಟ ರಾಜಕಾರಣಿಗಳನ್ನು, ಲಂಚಾವತಾರಿ ಅಧಿಕಾರಿಗಳನ್ನು ಬೈಯ್ಯುತ್ತಾರೆ ಎನ್ನುವ ಕಾರಣಕ್ಕೆ. ಜನಸಾಮಾನ್ಯರು ಯಾರ್ಯಾರನ್ನೆಲ್ಲಾ ಬೈಯ್ಯುವುದಕ್ಕೆ ತುಂಬಾ ಸಮಯದಿಂದ ಕಾಯುತ್ತಿರುತ್ತಾರೋ ಅಂಥವರನ್ನೆಲ್ಲಾ ಬೈಯ್ಯುತ್ತಾ ಹೋಗುವ ಹಿರಣ್ಣಯ್ಯ ಎಷ್ಟೋ ಸಲ ನಮ್ಮೊಳಗಿನ ಕ್ರೋಧದ ದನಿಯಾಗಿಬಿಡುತ್ತಾರೆ, ಜನರೊಳಗಿನ ಜ್ವಾಲಾಮುಖಿಯ ಮುಖವಾಗಿಬಿಡುತ್ತಾರೆ.

ಇವರು ಭ್ರಷ್ಟರನ್ನು ಕೆಣಕಲು, ಚುಚ್ಚಲು ಆಯ್ದುಕೊಂಡದ್ದು ರಂಗಭೂಮಿಯನ್ನು. ತಮ್ಮ ಮನೋಜ್ಞ ಅಭಿನಯದಿಂದ ಅಪ್ರತಿಮ ಹಾಸ್ಯ ಪ್ರಜ್ಞೆಯಿಂದ ಜನರ ಮನಸ್ಸಿಗೆ ಹತ್ತಿರವಾದವರು. ಜನತಾ ದರ್ಬಾರಿನ ತೆನಾಲಿ ರಾಮನಾದರು. ಹಾಸ್ಯದ ರಸಾಯನದೊಂದಿಗೆ ವಾಸ್ತವದ ಕಹಿಗುಳಿಗೆಗಳನ್ನು ಉಣಬಡಿಸಿದರು. ಅದೊಂದೇ ಕಾರಣಕ್ಕಾಗಿ ಅವರು ಅಗ್ಗದ ಹಾಸ್ಯ ನಟರಾಗುವ ಅಪಾಯದಿಂದ ಪಾರಾದರು.

ಮಾಸ್ಟರ್ ಹಿರಣ್ಣಯ್ಯನವರ ಸಂಪೂರ್ಣ ಜೀವನ ಕಥೆ ಅವರ ಮಾತುಗಳಲ್ಲೇ ಕೇಳಿ. ಅವರ ನಾಟಕದ ಧ್ವನಿ ಮುದ್ರಣವನ್ನೂ ಕೇಳಲಿಕ್ಕೆ ಈ ತಾಣಕ್ಕೆ ಭೇಟಿ ಕೊಡಿ.

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

………………………………………………………………

ಕಳೆದ ಸಂಚಿಕೆಯ ನಗಾರಿ ರೆಕಮಂಡೇಶನ್