ನಗಾರಿ ರೆಕಮಂಡೇಶನ್ 23

ಅವನದೆಂತಹ ಶ್ರೇಷ್ಠ ವಿಜ್ಞಾನಿಯೇ ಆಗಲಿ, ಆತನಿಂದ ಕಾಲ್ಪನಿಕ ವ್ಯಕ್ತಿಯನ್ನು, ವಸ್ತುವನ್ನು ಇಲ್ಲ ಎಂದು ಸಾಬೀತು ಮಾಡಲಿಕ್ಕೆ ಸಾಧ್ಯವಿಲ್ಲ ಎನ್ನುತ್ತದೆ ತರ್ಕ.

ಇದನ್ನು ವಿವರಿಸಲು ಖ್ಯಾತ ದಾರ್ಶನಿಕ ಬರ್ಟ್ರಂಡ್ ರಸೆಲ್ ಭೂಮಿಯ ಸುತ್ತಲಿನ ಕಕ್ಷೆಯಲ್ಲಿ ಟೀ ಪಾಟ್ ಒಂದು ಸುತ್ತುತ್ತಿದೆ ಎಂದ. ಅದನ್ನು ಅಲ್ಲಗಳೆಯಲು ಸಾಧವೇ ಇರಲಿಲ್ಲ. ಆದರೆ ಮನುಷ್ಯ ಅಂತರಿಕ್ಷಕ್ಕೆ ಜಿಗಿಯುವಲ್ಲಿ ಸಫಲನಾಗಿ, ಭೂಕಕ್ಷೆಯಲ್ಲಿ ಟೀ ಪಾಟ್ ಅಷ್ಟೇ ಏಕೆ ದೊಡ್ಡ ಉಪಗ್ರಹವನ್ನೇ ಇಡಬಲ್ಲವನಾದಾಗ ರಸೆಲ್ ಮಾತನ್ನು ಸುಳ್ಳು ಎಂದು ಸಾಬೀತು ಮಾಡಲು ಅವಕಾಶವಾಯಿತು.

ಆದರೆ ರಸೆಲ್ ಈಗ ಬದುಕಿದ್ದರೆ ತನ್ನ ಪ್ರಶ್ನೆಯಲ್ಲಿ ಸಣ್ಣ ಮಾರ್ಪಾಡು ಮಾಡಿ ಭೂಕಕ್ಷೆಯಲ್ಲಿ ಕಣ್ಣಿಗೆ ಕಾಣದ, ವಾಸನೆಯಿಲ್ಲದ, ಸದ್ದು ಹೊರಡಿಸದ, ರೆಡಾರ್ ಗಮನಕ್ಕೆ ಬಾರದ, ವಿಕಿರಣ ಹೊರಸೂಸದ ಟೀ ಪಾಟ್ ಸುತ್ತುತ್ತಿದೆ ಎನ್ನುತ್ತಿದ್ದನೇನೋ!

ಇರಲಿ, ಇವೆಲ್ಲ ಪೀಠಿಕೆ ಪ್ರಸ್ತಾವನೆಯ ಅಗತ್ಯವೇನೆಂದರೆ, ನಮ್ಮ ಈ ಸಂಚಿಕೆಯ ರೆಕಮಂಡೇಶನ್ ಜಗತ್ತಿನಲ್ಲೇ ಅತಿ ವಿವಾದಾಸ್ಪದ ವ್ಯಕ್ತಿಗೆ ಸಂಬಂಧಿಸಿದ್ದು. ವಿವಾದ ಹುಟ್ಟಿಕೊಳ್ಳುವುದಕ್ಕೆ ಖುದ್ದು ಆ ವ್ಯಕ್ತಿಯು ಏನನ್ನೂ ಮಾಡಿಲ್ಲವಾದರೂ ಆತನ ಸುತ್ತಲಿರುವ ವಿವಾದದ ಶಾಖ ಅತಿ ಪ್ರಬಲವಾದದ್ದು. ಈ ವಿವಾದ ನಮ್ಮ ಟಿವಿ ‘ಸಚ್ಕಾ ಸಾಮ್ನಾ’ ಆಗುವುದಕ್ಕೆ ಮುಂಚಿನಿಂದಲೂ ಜೀವಂತವಾಗಿದೆ ಎಂದರೆ ಅದೆಷ್ಟು ಪ್ರಾಚೀನವಾದದ್ದು ಹಾಗೂ ಜನಪ್ರಿಯವಾದದ್ದು ಎನ್ನುವುದು ಅರಿವಾಗುತ್ತದೆ.

ಹೌದು! ನಿಮ್ಮ ಊಹೆ ಸರಿಯೇ. ಆತ ಆ ದೇವರು.

ದೇವರು ಹೇಗಿದ್ದಾನೆ, ಆತನ ರೂಪ ಯಾವುದು, ಆತನ ಲಿಂಗ ಯಾವುದು, ಆತ ಯಾರನ್ನು ಸ್ವರ್ಗಕ್ಕೆ ಕಳುಹಿಸುತ್ತಾನೆ, ಯಾರನ್ನು ನರಕಕ್ಕೆ ಅಟ್ಟುತ್ತಾನೆ ಎಂಬಿತ್ಯಾದಿ ಪ್ರಶ್ನೆಗಳು ಸರಕಾರಿ ಕಛೇರಿಯ ಗುಮಾಸ್ತರಿದ್ದ ಹಾಗೆ ಎಷ್ಟು ತುರುಕಿದರೂ ತೃಪ್ತವಾಗುವುದಿಲ್ಲ. ಈ ಪ್ರಶ್ನೆಗಳ ಗುಮಾಸ್ತರ ಹೊಟ್ಟೆ ತಣಿಸುವ ಹೊಸ ಪ್ರಯತ್ನ ಸಂಪದ ಸಮುದಾಯ ತಾಣದಲ್ಲಿ ಸುಪ್ರೀತ್.ಕೆ.ಎಸ್ ಎಂಬುವವರು ನಡೆಸುತ್ತಿದ್ದಾರೆ.

ಒಂದು ಎಚ್ಚರ: ಈ ರೆಕಮಂಡೇಶನ್  ಬುದ್ಧಿವಂತರಿಗೆ ಮಾತ್ರ. ಇದನ್ನು ಓದುವುದರಿಂದುಂಟಾಗುವ ಮಾನಸಿಕ ಕ್ಲೇಷಾದಿಗಳಿಗೆ ನಾವು ಜವಾಬ್ದಾರರಲ್ಲ.

ಸ್ವಘಟ್ಟಿ ತತ್ವಚಿಂತನೆಯ ಸ್ಯಾಂಪಲ್ ನಗಾರಿ ಸಾಮ್ರಾಜ್ಯದ ಪ್ರಜೆಗಳಿಗಾಗಿ:

ಈ ಜಗತ್ತಿನಲ್ಲಿ ಸ್ವಘಟ್ಟಿ  ಎಂಬ ಮೂರು ಕೈಗಳ, ನಾಲ್ಕು ನಾಲಿಗೆಗಳ, ಎರಡು ತಲೆಗಳ, ಹದಿನಾರು ಕಿಡ್ನಿಗಳ ಮನುಷ್ಯ  ಇಲ್ಲವೇ ಇಲ್ಲ ಎನ್ನುವುದು ಅನಾಗರೀಕರಾದ, ಕಾಮನ್ ಸೆನ್ಸ್ ಇಲ್ಲದ, ವಿತಂಡ ವಾದಿಗಳಾದ, ನರಕವನ್ನೇ ಭವಿಷ್ಯವನ್ನಾಗಿ ಹೊಂದಿರುವ ನಾಸ್ತಿಕರ ವಾದ. ಇವರು ನಮ್ಮೆಲ್ಲರನ್ನು ಕಾಯುವ, ತನ್ನ ಹದಿನಾಲ್ಕು ಕಿಡ್ನಿಗಳಿಂದ ನಮ್ಮ ಪಾಪಗಳನ್ನು ಶುದ್ಧೀಕರಿಸಿ ಜಗತ್ತನ್ನು ಉದ್ಧಾರ ಮಾಡುವ ಸ್ಬಘಟ್ಟಿಯ ಅಸ್ತಿತ್ವವನ್ನೇ ಪ್ರಶ್ನಿಸುತ್ತಾರೆ. ಉದ್ದುದ್ದ ಭಾಷಣ ಚಚ್ಚುತ್ತಾರೆ. 

ಇವರಿಗೆ ಸ್ವಘಟ್ಟಿಯ ಮಹಿಮೆಯ ಬಗ್ಗೆ ಆತನ ಮೂರು ಕೈಯ ವೈಶಿಷ್ಟ್ಯದ ಬಗ್ಗೆ ಹೇಳಲು ಹೋದರೆ, ಸ್ವಘಟ್ಟಿಯನ್ನು ಆರಾಧಿಸಿ ಎನ್ನಲು ಹೋದರೆ ಸ್ವಘಟ್ಟಿ ಇರುವುದಕ್ಕೆ ಸಾಧ್ಯವೇ ಇಲ್ಲ. ಆತ ಇದ್ದಾನೆ ಎನ್ನುವುದಕ್ಕೆ ಸಾಕ್ಷಿ ಕೊಡು ಎನ್ನುತ್ತಾರೆ. ಮನುಷ್ಯನಿಗೆ ಎರಡು ಕೈ ಒಂದು ತಲೆ, ಒಂದು ನಾಲಿಗೆ ಇರುತ್ತೆ(ಕೆಲವರು ಅದನ್ನು ಎರಡಾಗಿ ಬಳಸುತ್ತಾರೆ) , ಎರಡು ಕಿಡ್ನಿಗಳಿರುತ್ತೆ(ಕೆಲವರ ಒಂದು ಕಿಡ್ನಿ ಮಾರಾಟವಾಗಿರುತ್ತೆ) – ಸ್ವಘಟ್ಟಿಯಂಥ ಮನುಷ್ಯ ಇರುವುದಕ್ಕೆ ಯಾವ ಸಾಕ್ಷಿಯೂ ಇಲ್ಲ. ಆತ ಇದ್ದಾನೆ ಎನ್ನುವುದಕ್ಕೆ ನೀವೇನಾದರೂ ಅವನನ್ನು ನೋಡಿದ್ದೀರಾ ಎಂದು ಉದ್ಧಟತನದ ಮಾತನಾಡುತ್ತಾರೆ.

ಸ್ವಘಟ್ಟಿಯನ್ನು ನಮ್ಮ ಮನದಾಳದಲ್ಲಿ ಸ್ಥಾಪಿಸಿಕೊಂಡು ಪ್ರತಿದಿನ ಆತನ ಮೂರು ನಾಲಿಗೆಗಳಲ್ಲಿ ಮೆದುಳನ್ನು  ನೆಕ್ಕಿಸಿಕೊಳುವ ನಾವೇನು ಆತನನ್ನು ನೋಡಿಲ್ಲ. ಆತನನ್ನು ನಮ್ಮ ಮುತ್ತಾತನ ಮುತ್ತಾತನ ಮುತ್ತಾತ ಕಂಡಿದ್ದನಂತೆ.

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 13

ನಗಾರಿ ರೆಕಮಂಡೇಶನ್! ಹೌದು, ಅಂತರ್ಜಾಲವೆಂಬ ಸಾಗರದಲ್ಲಿ ನಗೆ ಬುಗ್ಗೆಗಳನ್ನು ಅರಸುತ್ತಾ ಸಾಮ್ರಾಟರು ಅಲೆಯುತ್ತಲೇ ಇರುತ್ತಾರೆ. ಕೆಲವು ಬುಗ್ಗೆಗಳು ಕಂಡ ಕೂಡಲೇ ನಗಾರಿಗೆ ಬಂದು ಇಲ್ಲಿ ಅವನ್ನು ಪರಿಚಯಿಸುತ್ತಾರೆ. ಈ ಸಂಚಿಕೆಯಲ್ಲಿ ನಗೆ ಸಾಮ್ರಾಟರು ನಮಗೆ ಎಲ್ಲಿಗೆ ಕರೆದುಕೊಂದು ಹೋಗಲಿದ್ದಾರೆ ನೋಡೋಣ.

…………………………………………..

ಸೈರಸ್ ಬ್ರೋಚಾ!

ಈತನ ಹೆಸರು ನೀವು ಕೇಳಿರುತ್ತೀರಿ ಕೇಳಿಲ್ಲವಾದರೂ ಈತನನ್ನು ಟಿವಿಯಲ್ಲಿ ನೋಡಿರುತ್ತೀರಿ. ನೋಡಿಲ್ಲವಾದರೂ ಈತನ ಕಾರ್ಯಕ್ರಮದ ಬಗ್ಗೆಯಂತೂ ಅವರಿವರಿಂದ ತಿಳಿದುಕೊಂಡೇ ಇರುತ್ತೀರಿ. ಎಂಟಿ ಎಂಬ ಮ್ಯೂಸಿಕ್ ಚಾನೆಲ್ಲಿನಲ್ಲಿ ‘ಎಂಟಿವಿ ಬಕ್ರಾ’ ಎಂಬ ಕಾರ್ಯಕ್ರಮವನ್ನು ಮಾಡಿ ತಾನೂ, ತನ್ನ ಚಾನಲ್ಲನ್ನೂ ಹೆಸರುವಾಸಿ ಮಾಡಿದವ ಈತ. ಎಂಟಿವಿಯ ಅತ್ಯಂತ ಪ್ರಸಿದ್ಧ ಮುಖವಾದ ಬ್ರೋಚಾ ಎಂಟಿವಿಗಾಗಿ ಸಂದರ್ಶಿಸದ ನಟನಟಿಯರು ಬಾಲಿವುಡ್ಡಿನಲ್ಲಿಲ್ಲ ಎಂಬ ಹಿರಿಮೆ ಆತನದು.

ಈತನಿಗೆ ನಟನೆಯಲ್ಲಿ ವಿಪರೀತ ಆಸಕ್ತಿಯಂತೆ. ತನ್ನ ಐದನೆಯ ವಯಸ್ಸಿನಲ್ಲೇ ಸಿನೆಮಾದಲ್ಲಿ ನಟಿಸಲು ಶುರುಮಾಡಿದ್ದನಂತೆ. ಮುಂದೆ ನ್ಯೂಯಾರ್ಕಿಗೆ ಹೋಗಿ ನಟನೆಯ ವಿಷಯದಲ್ಲಿ ಮಣ್ಣು ಹೊತ್ತು ಹಾಕಿದ್ದೂ ಆಯ್ತು. ತನ್ನ ಹಾಸ್ಯ, ಕೊಂಕು ಹಾಗೂ ಕಾಲೆಳೆಯುವಿಕೆಯಿಂದ ಎಂಟಿವಿಯಲ್ಲಿ ಹೆಸರುವಾಸಿಯಾದ ಈತ ತನ್ನ ಗೆಳೆಯ ಕುನಾಲ್ ವಿಜಯಕರ್ ನಿರ್ದೇಶನದಲ್ಲಿ ಸಿಎನ್‍ಎನ್ ಐಬಿಎನ್ ಚಾನೆಲ್ಲಿಗೆ ಪ್ರತಿವಾರಕ್ಕೊಮ್ಮೆ ‘ದ ವೀಕ್ ದಟ್ ವಾಸನ್ಟ್’ ಎಂಬ ಕಾರ್ಯಕ್ರಮವನ್ನು ನಡೆಸಿಕೊಂಡು ಬರುತ್ತಿದ್ದಾನೆ. ಈ ಕಾರ್ಯಕ್ರಮ ಪ್ರಸಿದ್ಧಿಯ ಅಲೆಯಲ್ಲಿ ತೇಲುತ್ತಾ ಒಂದು ವರ್ಷ ಮುಗಿಸಿದೆ.

ತುಂಬಾ ಚುಟುಕಾದ, ಮೊನಚಾದ, ಕ್ಲುಪ್ತವಾದ ಹಾಸ್ಯದಿಂದ ರಂಜನೆ ನೀಡುವ ಸೈರಸ್ ಬ್ರೋಚಾ ಇತ್ತೀಚೆಗೆ ಅಂತ್ಯವಾದ ಒಲಿಂಪಿಕ್ಸಿನ ಬಗೆಗೆ ಮೂರು ಕಾರ್ಯಕ್ರಮಗಳನ್ನು ನಡೆಸಿದ್ದಾನೆ. ಇವು ಬ್ರೋಚಾನ ಹಾಸ್ಯದ ಸ್ಯಾಂಪಲ್ಲುಗಳು.

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ಸ್ 12

ನಗಾರಿ ರೆಕಮಂಡೇಶನ್! ಹೌದು, ಅಂತರ್ಜಾಲವೆಂಬ ಸಾಗರದಲ್ಲಿ ನಗೆ ಬುಗ್ಗೆಗಳನ್ನು ಅರಸುತ್ತಾ ಸಾಮ್ರಾಟರು ಅಲೆಯುತ್ತಲೇ ಇರುತ್ತಾರೆ. ಕೆಲವು ಬುಗ್ಗೆಗಳು ಕಂಡ ಕೂಡಲೇ ನಗಾರಿಗೆ ಬಂದು ಇಲ್ಲಿ ಅವನ್ನು ಪರಿಚಯಿಸುತ್ತಾರೆ. ಈ ಸಂಚಿಕೆಯಲ್ಲಿ ನಗೆ ಸಾಮ್ರಾಟರು ನಮಗೆ ಎಲ್ಲಿಗೆ ಕರೆದುಕೊಂದು ಹೋಗಲಿದ್ದಾರೆ ನೋಡೋಣ.

ನಮಸ್ತೇ,
ಹಾಸ್ಯ ಪುಸ್ತಕಗಳಲ್ಲಿಲ್ಲ ಅನ್ನುತ್ತಾರೆ. ಅದು ನಿಜವೇ. ಹಾಸ್ಯ ಇರುವುದು ನಮ್ಮ ಮನೋಭಾವದಲ್ಲಿ, ನಮ್ಮ ಬದುಕಿನ ಶೈಲಿಯಲ್ಲಿ. ಒಟ್ಟಾರೆಯಾಗಿ ನಮ್ಮ ವ್ಯಕ್ತಿತ್ವದಲ್ಲಿ. ಹೀಗಾಗಿ ಯಾವ ಕ್ಷೇತ್ರದಲ್ಲೇ ಆಗಲಿ ಹಾಸ್ಯವನ್ನು ಕಾಣಬಹುದು.

ಕನ್ನಡದಲ್ಲಿ ಬ್ಲಾಗು ಪ್ರಪಂಚ ಇನ್ನಷ್ಟು ವಿಸ್ತಾರವಾದ ಹಾಗೆ ನಾನಾ ಬಗೆಯ ಕ್ಷೇತ್ರಗಳಲ್ಲಿ ಪರಿಣಿತಿ ಹೊಂದಿರುವವರು ತಮ್ಮ ಕ್ಷೇತ್ರಗಳಲ್ಲಿ ಗುಪ್ತಗಾಮಿನಿಯಾಗಿ ಹರಿಯುವ ಹಾಸ್ಯದ ಬಗ್ಗೆ ಬರೆಯುತ್ತಾರೆ ಎಂದು ನಿರೀಕ್ಷಿಸಬಹುದು (ಯಾಕೆಂದರೆ ಈಗ ಎಲ್ಲರೂ ಸುಲಭವಾಗಿ ತಮ್ಮ ಮೇಲ್ ಬಾಕ್ಸಿಗೆ ಬಂದ ಜೋಕನ್ನು ಕನ್ನಡೀಕರಿಸಿ ಬ್ಲಾಗಿಗೆ ಹಾಕಿಕೊಂಡು ಬಿಡುತ್ತಾರೆ!). ಆದರೆ ಇಂಗ್ಲೀಷಿನಲ್ಲಿ ಈ ಬಗೆಯ ವಿಡಂಬನೆ, ಹಾಸ್ಯಕ್ಕೆ ಯಾವ ಕೊರತೆಯೂ ಇಲ್ಲ.

ಕಾರ್ಪೋರೇಟ್ ಕ್ಷೇತ್ರ ಅಂದ ಕೂಡಲೇ ನಮಗೆ ತೀರಾ ಸ್ವಚ್ಛವಾದ, ಗರಿಮುರಿಯದ ಸೂಟು ಹಾಕಿಕೊಂಡ ಪ್ಲಾಸ್ಟಿಕ್ ನಗೆಯ ಮುಖಗಳು ಕಾಣುತ್ತವಲ್ಲವೇ? ಯಾವಾಗಲೂ ಪರ್ಸನಾಲಿಟಿ ಡೆವಲಪ್ ಮೆಂಟ್ ಎನ್ನುತ್ತಲೇ ತಿರುಗುವ ಜನರು ಕಾಣುತ್ತಾರೆ. ಇವರ ನಡುವೆ ಅದೆಂಥಾ ಹಾಸ್ಯ ಇರಲಿಕ್ಕೆ ಸಾಧ್ಯ ಅಂತಲೂ ಅನ್ನಿಸುತ್ತದೆ. ಆದರೆ ಒಮ್ಮೆ ಈ ಬ್ಲಾಗನ್ನು ಹೊಕ್ಕು ನೋಡಿ, ಬ್ಲಾಕ್ ಝೆಡ್ಡಿ (ಕಪ್ಪು ಚೆಡ್ಡಿ?!) ಎಂಬುವವನ ಬೇಸಿಕ್ ಲಿಟರೇಚರ್ ಎಂಬ ಬ್ಲಾಗಿದು. ಇಲ್ಲಿ ಇವತ್ತಿನ ಕಾರ್ಪೋರೇಟ್ ಜಗತ್ತಿನ ವಿಡಂಬನೆಯಿದೆ.

ಇತ್ತೀಚಿನ ಲೇಖನವೊಂದರಲ್ಲಿ ನೀವು ಕೆಲಸಕ್ಕೆ ಸೇರಿದ ಮೊದಲನೆಯ ದಿನ ಏನು ಮಾಡಬೇಕು ಎಂದು ಹದಿನೈದು ಟಿಪ್‌ಗಳನ್ನು ಕೊಡಲಾಗಿದೆ. ಅವುಗಳಲ್ಲಿನ ಕೆಲವು ಸ್ಯಾಂಪಲ್‌ಗಳನ್ನು ನೋಡಿ…

೧. ಸರಿಯಾದ ಸಮಯಕ್ಕೆ ಆಫೀಸಿಗೆ ಹೋಗಿ (ಸಮಯಕ್ಕೆ ಮುಂಚೆ ಅಲ್ಲ!)
ನಿಮ್ಮ ಸಹೋದ್ಯೋಗಿಗಳಿಗೆ ವಿವರಿಸಿ ಹೇಳಿ: “ಸರಿಯಾದ ಸಮಯಕ್ಕೆ ಬರುವ ಜನರು ಶಿಸ್ತು, ಸಮಯ ಪಾಲನೆಯ ಬಗ್ಗೆ ತಿಳಿದಿರುತ್ತಾರೆ”. ಅದು ಎಂಥಾ ಪ್ರಭಾವ ಬೀರುತ್ತೆ ಎಂಬುದನ್ನು ನೋಡಿ.

೨. ಮನೆಯಿಂದಲೇ ಕೆಲವು ಕಡತಗಳನ್ನು ಒಯ್ದಿರಿ
ಓದಲು ಮ್ಯಾಗಝೀನುಗಳನ್ನೋ, ಪೇಪರನ್ನೋ ತೆಗೆದುಕೊಂಡು ಹೋಗಿ. ಮೊದಲನೆಯ ದಿನ ನಿಮಗೆ ಯಾವ ಕೆಲಸ ವಹಿಸಬೇಕು ಎಂದು ತೀರ್ಮಾನವಾಗುವುದರಲ್ಲೇ ಕಳೆದು ಹೋಗುತ್ತದೆ. ಆ ಸಮಯದಲ್ಲಿ ಸುಮ್ಮನೆ ಕಂಪನಿಯ ಮ್ಯಾನುಯಲ್ಲನ್ನು ಓದುತ್ತಾ ಕಿರಿಕಿರಿಗೊಳ್ಳಬೇಡಿ.

ಇನ್ನಷ್ಟು ಟಿಪ್‌ಗಳು ಬೇಕೆ? ಬೇಸಿಕ್ ಲಿಟರೇಚರ್‌ಗೆ ಭೇಟಿ ಕೊಡಿ ಮತ್ತೆ!

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 11

ಅಂತರ್ಜಾಲದ ಮುಕ್ತ ವಿಶ್ವಕೋಶದ ತಾಣ ವಿಕಿಪಿಡಿಯಾದ ಬಗ್ಗೆ ತಿಳಿಯದವರೇ ಇಲ್ಲ. ಯಾವುದೇ ವಿಷಯದ ಬಗ್ಗೆ ಮಾಹಿತಿ ಬೇಕಾದರೆ ಅಂತರ್ಜಾಲದಲ್ಲಿ ‘ಹುಡುಕುವುದು’ ಎಂಬ ಪದಕ್ಕೆ ‘ಗೂಗಲ್’ ಪರ್ಯಾಯವಾಗಿರುವ ಹಾಗೆಯೇ ವಿಶ್ವಕೋಶ ಎಂಬ ಪದಕ್ಕೆ ಪರ್ಯಾಯವಾಗಿ ರೂಪುಗೊಂಡಿರುವುದು ಈ ವಿಕಿಪಿಡಿಯಾ. ಇದರಲ್ಲಿನ ಮಾಹಿತಿ ಪುಟಗಳಿಗೆ ಜಗತ್ತಿನ ಯಾರು ಬೇಕಾದರೂ ತಮ್ಮ ಬಳಿಯಿರುವ ಮಾಹಿತಿಯನ್ನು ಸೇರಿಸಿ ಸೂಕ್ತ ಆಧಾರಗಳನ್ನು ಒದಗಿಸಬಹುದು. ಅದನ್ನು ಅದೇ ವಿಷಯದ ಮತ್ತ್ಯಾವುದೋ ಪ್ರದೇಶದ ಜನರು ತಿದ್ದಬಹುದು. ಇದು ಅಂತರ್ಜಾಲದಲ್ಲಿ ಖ್ಯಾತಿಯನ್ನು ಪಡೆದಿರುವ ತಾಣ.

ಈ ವಿಕಿಪಿಡಿಯಾದ ಶೈಲಿಯನ್ನೇ ಅನುಸರಿಸಿ ಕೇವಲ ವಿಡಂಬನೆ, ಹಾಸ್ಯ, ಕಾಲೆಳೆಯುವಿಕೆ, ಕೊಂಕುಗಳಿಗಾಗಿ ಮೀಸಲಾದ ಒಂದು ತಾಣ ೨೦೦೫ರಲ್ಲಿ ಶುರುವಾಗಿದೆ. ಇದರ ಹೆಸರು ಅನ್‌ಸೈಕ್ಲೊಪಿಡಿಯಾ. ವಿಕಿಪಿಡಿಯಾದ ಮಾದರಿಯನ್ನೇ ಅನುಸರಿಸಿಕೊಂಡು, ವಿಕಿಪಿಡಿಯಾದ ಪ್ರತಿಯೊಂದು ಮಾಹಿತಿ ಪುಟಕ್ಕೂ ಪರ್ಯಾಯವಾದ ವಿಡಂಬನೆಯ, ಶುದ್ಧ ಹಾಸ್ಯ – ಅಪಹಾಸ್ಯದ ಮಾಹಿತಿ ಇರುವ ಪುಟಗಳನ್ನು ಇಲ್ಲಿ ಪ್ರಕಟಿಸಲಾಗುತ್ತದೆ. ವಿಕಿಪಿಡಿಯಾದಲ್ಲಿರುವ ಎಲ್ಲಾ ಮಾಹಿತಿ ಪುಟಗ ಮೇಲೆ ವಿಡಂಬನೆಯ ಪುಟಗಳನ್ನು ತೆರೆಯುವುದು ಅವರ ಉದ್ದೇಶ. ಈಗಾಗಲೇ ಈ ತಾಣದಲ್ಲಿ ಇಂಗ್ಲೀಷಿನಲ್ಲಿ ಸುಮಾರು ಇಪ್ಪತ್ಮೂರು ಸಾವಿರಕ್ಕಿಂತ ಹೆಚ್ಚು ಲೇಖನಗಳು ಲಭ್ಯವಿದೆ.

ಹೀಗೇ ಸುಮ್ಮನೆ ನಿಮಗೆ ವಿಕಿಪಿಡಿಯಾದಲ್ಲಿನ ಹುಡುಕಾಟ ಮುಗಿದ ನಂತರ ಬೇಕಿದ್ದ ವಿಷಯದ ಬಗ್ಗೆ ಅನ್ ಸೈಕ್ಲೋಪಿಡಿಯಾದಲ್ಲಿ ಹುಡುಕಿ ನೋಡಿ ನೀವು ಬಿದ್ದು ಬಿದ್ದು ನಗುವಂಥ, ನಿಮ್ಮ ಹೊಟ್ಟೆ ಹುಣ್ಣಾಗಿಸುವಂಥ, ನಿಮ್ಮನ್ನು ಕೆರಳಿಸುವಂಥ, ಬೆಚ್ಚಿ ಬೀಳುವಂಥ ಹಾಸ್ಯ ಇಲ್ಲಿ ಸಿಕ್ಕುತ್ತದೆ. ಉದಾಹರಣೆಗೆ ಈ ಪುಟವನ್ನೇ ನೋಡಿ, ಗಾಂಧೀಜಿಯ ಬಗ್ಗೆ ಅನ್ ಸೈಕ್ಲೋಪಿಡಿಯಾದಲ್ಲಿರುವ ಪುಟವಿದು. ಹಾಗೆಯೇ ಇದನ್ನು ನೋಡಿ ಇದು ಅಡಾಲ್ಫ್ ಹಿಟ್ಲರನ ಬಗೆಗಿರುವ ಪುಟ.

ಇದು ಈ ಸಂಚಿಕೆಯ ನಗಾರಿ ರೆಕಮಂಡೆಶನ್!