ನಗಾರಿ ರೆಕಮಂಡೇಶನ್ 29:‌ಟಾಮ್ ಮತ್ತು ಜೆರ್ರಿ

ಜನರನ್ನು ನಗಿಸುವುದು ಸುಲಭದ ಕೆಲಸವಲ್ಲ. ಕೂದಲಿಂದ ಬೆರಳ ತುದಿಯವರೆಗೆ ಚಿತ್ರ ವಿಚಿತ್ರವಾದ ವೇಷ ತೊಟ್ಟು ಬಫೂನಿನಂತೆ ಕುಣಿಯಬೇಕು. ಪದಗಳ ಮೋಡಿಯಲ್ಲಿ ಕೆಡವಿ ಪಂಚುಗಳ ಮೇಲೆ ಪಂಚುಗಳನ್ನು ಕೊಡಬೇಕು. ನೇರವಾದ ಸತ್ಯವನ್ನು ವಕ್ರಗೆರೆಗಳ ದಾಳಿಗೆ ಈಡು ಮಾಡಬೇಕು. ಪ್ರಸಿದ್ಧ ನಟನ, ಪ್ರಸಿದ್ಧ ರಾಜಕಾರಣಿಯ ಕಾಲೆಳೆಯಬೇಕು. ಇಷ್ಟೆಲ್ಲ ಮಾಡಿದರೂ `ನಗದು’ ಎನ್ನುವಂತಹ ಸ್ಪೀಶಿಗಳಿರುತ್ತವೆ. ಹೀಗಿರುವಾಗ ಆ ಎರಡು ಪಾತ್ರಗಳು ಮಾತಿಲ್ಲದೆ, ವಿಡಂಬನೆಯಿಲ್ಲದೆ, ವ್ಯಂಗ್ಯಾರ್ಥ, ದ್ವಂದ್ವಾರ್ಥದ ಹಂಗಿಲ್ಲದೆ, ಅಣಕವಾಡುವ ಆವಶ್ಯಕತೆಯಿಲ್ಲದೆ ಕೇವಲ ತಮ್ಮ ಚಿನ್ನಾಟ, ತುಂಟಾಟಗಳಿಂದಲೇ ಚಿಕ್ಕ ಮಕ್ಕಳಿಂದ ಹಿಡಿದು ಹಣ್ಣು ಮುದುಕರವರೆಗೆ, ಮುಗ್ಧ ಬಾಲಕರಿಂದ ಹಿಡಿದು ಪಿಎಚ್ಡಿ ಬುದ್ಧಿವಂತರವರೆಗೆ, ಥೇಮ್ಸ್ ಪುತ್ರರಿಂದ ಹಿಡಿದು ಕೆಂಗೇರಿ ಏರಿಯಾದ ಮನೆಯ ಹುಡಗನವರೆಗೆ ಎಲ್ಲರನ್ನೂ ಬಿದ್ದು ಉರುಳಾಡಿ ನಗುವಂತೆ ಮಾಡಿದವು.

ಹೌದು ಅವು ಟಾಮ್ ಮತ್ತು ಜೆರ್ರಿ!

ವಿಲಿಯಂ ಹನ್ನಾ ಹಾಗೂ ಜೋಸೆಫ್ ಬಾರ್ಬರಾ ಎಂಬಿಬ್ಬರು ಪ್ರತಿಭಾವಂತರು ಸೇರಿ ಸೃಷ್ಟಿಸಿದ ಪಾತ್ರಗಳು-  ಟಾಮ್  ಎಂಬ ಹೆಸರಿನ ಮನೆ ಬೆಕ್ಕು, ಜೆರ್ರಿ ಎಂಬ ಹೆಸರಿನ ತುಂಟ ಇಲಿ.  ಬೆಕ್ಕಿಗೆ ಚಿನ್ನಾಟ ಇಲಿಗೆ ಪ್ರಾಣ ಸಂಕಟವೆಂಬ ಗಾದೆ ಮಾತನ್ನು ಈ ಟಾಮ್ ಹಾಗೂ ಜೆರ್ರಿಗಳು ತಲೆಕೆಳಗು ಮಾಡಿದವು. ಅಂಗೈ ಗಾತ್ರದ ಪುಟ್ಟ ಇಲಿ ಟಾಮ್ನನ್ನು ಕೆಣಕುವುದು, ಟಾಮ್ ನಾನಾ ತಂತ್ರಗಳನ್ನು ಹೂಡಿ ಜೆರ್ರಿಯನ್ನು ಹಿಡಿಯಲು ಹೊಂಚುವುದು. ಜೆರ್ರಿ ತಪ್ಪಿಸಿಕೊಂಡು ಓಡುತ್ತಲೇ ಟಾಮ್ಗೆ ತಿರುಗಿ ಟಾಂಗು ಕೊಡುವುದು – ಇಷ್ಟನ್ನೇ ವೈವಿಧ್ಯಮಯವಾಗಿ ನೂರಕ್ಕೂ ಹೆಚ್ಚು ಸ್ಕೆಚ್ಚುಗಳಲ್ಲಿ ತೋರಿದ ಹನ್ನಾ ಬಾರ್ಬರಾ ಜೋಡಿ ಮನರಂಜನೆಯಲ್ಲಿ ಹೊಸತೊಂದು ಪರಂಪರೆಯನ್ನೇ ಹುಟ್ಟುಹಾಕಿದರು.

ವಯಸ್ಸಾಗದ, ಮುಖ ಸುಕ್ಕು ಗಟ್ಟದ, ಖಾಯಿಲೆ ಬೀಳದ, ಸ್ಕ್ಯಾಂಡಲುಗಳಲ್ಲಿ ಸಿಲುಕಿ ಹೆಸರು ಕೆಡಿಸಿಕೊಳ್ಳದ, ಜನಪ್ರಿಯತೆಗಾಗಿ ಗಿಮಿಕ್ಕು ಮಾಡದ ಅನಿಮೇಶನ್ ತಂತ್ರಜ್ಞಾನದಲ್ಲಿ ರೂಪುಗೊಂಡ ಈ ಪಾತ್ರಗಳು ಜನರ ಮನಸ್ಸಿನಲ್ಲಿ ಹಚ್ಚ ಹಸಿರಾಗಿವೆ. ಟಾಮ್ ಹಾಗೂ ಜೆರ್ರಿಗಳ ಚಿನ್ನಾಟವನ್ನು ನೋಡದೆ ಈಗಿನ ಮಕ್ಕಳು ನಗುವುದನ್ನು ಕಲಿಯುವುದಿಲ್ಲ. ತಾವು ಎಳೆಯರಾಗಿದ್ದಾಗ ಕಂಡು ಖುಶಿಪಟ್ಟಿದ್ದ ಟಾಮ್ ಹಾಗೂ ಜೆರ್ರಿ ಕಾರ್ಟೂನುಗಳನ್ನು ತಮ್ಮ ಮಕ್ಕಳೊಂದಿಗೂ ಕೂತು ಎಂಜಾಯ್ ಮಾಡಬಹುದಾದ ವಿಶಿಷ್ಟತೆ ಇವುಗಳದು.

೧೯೪೦ರ ಫೆಬ್ರವರಿ ೧೦ರಂದು ಬಿಡುಗಡೆಯಾದ `ಪುಸ್ ಗೆಟ್ಸ್ ದ ಬೂಟ್’ ಸಿನೆಮಾದಲ್ಲಿ ಕಣ್ತೆರೆದ ಈ ಟಾಮ್ ಅಂಡ್ ಜೆರ್ರಿಗೆ ಎಪ್ಪತ್ತು ವರ್ಷಗಳು ಕಳೆದಿವೆ. ಇಂದಿಗೂ ಮಕ್ಕಳ, ವಯಸ್ಕರ ಕಣ್ಣುಗಳಲ್ಲಿ ಅದೇ ಲವಲವಿಕೆಯಿಂದ ಕುಣಿಯುತ್ತಿವೆ!

ಈ ಕೊಂಡಿಯಲ್ಲಿರುವ ತಾಣಕ್ಕೆ ಪ್ರವೇಶಿಸಿದರೆ ಬಹುತೇಕ ಎಲ್ಲಾ ಟಾಮ್ ಜೆರ್ರಿ ತುಂಟಾಟಗಳನ್ನು ಕಂಡು ಆನಂದಿಸಬಹುದು.

ಒಂದು ಸ್ಯಾಂಪಲ್ ಇಲ್ಲಿದೆ:

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 28: ‌ಸಂತಾ ಬಂತಾ ಡಾಟ್ ಕಾಮ್

ಒಂದು ಜನಾಂಗವನ್ನು ಗುರಿಯಾಗಿರಿಸಿಕೊಂಡ ಹಾಸ್ಯ  ಅದೇ ಜನಾಂಗದಲ್ಲಿ ಹುಟ್ಟಿ ಪ್ರಸಿದ್ಧಿಗೆ ಬಂದರೆ ಅದು ಆ ಜನಾಂಗದ ಹಾಸ್ಯ ಪ್ರಜ್ಞೆಗೆ ಸಾಕ್ಷಿಯಾಗುತ್ತದೆ. ಯಹೂದಿಗಳನ್ನು ಕುರಿತಾದ ಜೋಕುಗಳನ್ನು ಆ ಜನಾಂಗದ ಸದಸ್ಯರೇ ಜನಪ್ರಿಯಗೊಳಿಸಿದ್ದಾರೆ. ಖುದ್ದು ಸರ್ದಾರ್ ಆದ ಖುಶ್ವಂತ್ ಸಿಂಗ್ ಸರ್ದಾರ್ಜಿ ಜೋಕುಗಳನ್ನು ಜನಪ್ರಿಯಗೊಳಿಸಿದ್ದು ಭಾರತದ ಸಂದರ್ಭದಲ್ಲಿ ಮನನೀಯ ಉದಾಹರಣೆ.

ಸರ್ದಾರ್ಜಿ ಪಾತ್ರ ಪಂಜಾಬಿನ ಸಿಖ್ ಜನಾಂಗದ ಸದಸ್ಯರನ್ನು ಹೋಲುವುದಾದರೂ ಅದು ಸಾರ್ವತ್ರಿಕವಾಗಿ ಗುರುತಿಸಿಕೊಂಡಿರುವುದು ಎಲ್ಲಾ ಜನಾಂಗಗಳಲ್ಲೂ, ಎಲ್ಲರಲ್ಲೂ ಇರಬಹುದಾದ ಮೂರ್ಖತನ, ಎಡಬಿಡಂಗಿತನದ ಅಭಿವ್ಯಕ್ತಿಯಾಗಿ.

ಇಂತಹ ಸರ್ದಾರ್ ಜೋಕುಗಳ ದೊಡ್ಡ ಸಂಗ್ರಹವೇ ಇದೆ. ಹೊಸ ಜೋಕು ಹೊಸೆಯುವುದಕ್ಕೆ ಪಾತ್ರವೊಂದರ ಆವಶ್ಯಕತೆ ಕಂಡೊಡನೆ ಸರ್ದಾರ್ ಪ್ರತ್ಯಕ್ಷನಾಗುತ್ತಾನೆ.

ಸಂತಾ ಬಂತಾ ಡಾಟ್ ಕಾಮ್ ಸರ್ದಾರ್ ಜೋಕುಗಳಿಗೆ ದೇಶದಾದ್ಯಂತ ಪ್ರಸಿದ್ಧವಾದ ತಾಣ. ಪ್ರಚಲಿತ ವಿದ್ಯಮಾನಗಳನ್ನು ಕುರಿತ ಹರಿತವಾದ ವ್ಯಂಗ್ಯಚಿತ್ರಗಳು, ಅಗಾಧವಾದ ಜೋಕುಗಳು, ಸ್ಕ್ರೀನ್ ಸೇವರುಗಳು ಅಲ್ಲದೆ ಅನೇಕ ಸಲಕರಣೆಗಳನ್ನು ಹೊಂದಿರುವ ಸಂತಾ ಬಂತಾ ಡಾಟ್ ಕಾಮ್ ನ ವ್ಯಂಗ್ಯಚಿತ್ರದ ಸ್ಯಾಂಪಲ್ ಇಲ್ಲಿದೆ:

courtesy: santabanta.com

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 27 : ಹುಸಿ ಸುದ್ದಿ

ಮುಖ್ಯವಾಹಿನಿಯ ಪತ್ರಿಕೆಗಳಲ್ಲಿ ಪ್ರಕಟವಾಗುವ ನೈಜಸುದ್ದಿಗಳನ್ನು ಬಳಸಿ ಅವನ್ನು ವಕ್ರವಾಗಿ ತಿರುಗಿಸಿ ವಿಡಂಬನೆಯನ್ನು ಸತ್ಯ ಸುದ್ದಿಯ ಹಾಗೆಯೇ ವರದಿ ಮಾಡುವುದನ್ನು ಹುಸಿ ಸುದ್ದಿ (fake news) ಎನ್ನುತ್ತಾರೆ.

ಈ ಮಾಧ್ಯಮವನ್ನು ಬಳಸಿ ಸುದ್ದಿಯಲ್ಲಿರುವ ಅಸಂಬದ್ಧತೆ, ವಿವಾದಗಳ, ದೇಶ ವಿದೇಶದ ವಿದ್ಯಮಾನಗಳಲ್ಲಿ ಅಡಗಿರುವ ವಕ್ರ ಕೋನವನ್ನು ಹೊರಗೆಳೆದು ಲಂಬಿಸಿ ಹಿಗ್ಗಿಸಿ ತೋರುವ ಉದ್ದೇಶ ಈ ಹುಸಿ ಸುದ್ದಿಗಳನ್ನು ಸೃಷ್ಟಿಸುವ ಪತ್ರಕರ್ತನ ಕೆಲಸ.

ಭಾರತಕ್ಕೆ ಸಂಬಂಧಿಸಿದಂತೆ ಇಂತಹ ಹುಸಿ ಸುದ್ದಿಗಳನ್ನು ಹುಟ್ಟು ಹಾಕುವ ವೆಬ್ ಸೈಟ್ Faking News. ಪಾಗಲ್ ಪತ್ರಕಾರ್ (ಹುಚ್ಚ ಪತ್ರಕರ್ತ) ಎಂಬ ಹುಸಿ ನಾಮಾಂಕಿತ ಬ್ಲಾಗಿಗ ನಡೆಸುವ ಈ ತಾಣದಲ್ಲಿ ದಿನಕ್ಕೊಂದರಂತೆ ಹುಸಿ ಸುದ್ದಿಗಳು ಪ್ರಕಟವಾಗುತ್ತವೆ.

೨೦೦೮ರಲ್ಲಿ ಶುರುವಾದ ಈ ತಾಣದಲ್ಲಿ ರಾಷ್ಟ್ರೀಯ ಅಂತರಾಷ್ಟ್ರೀಯ ರಾಜಕೀಯ ಸುದ್ದಿಗಳಿಂದ ಹಿಡಿದು ತಂತ್ರಜ್ಞಾನ ಸಂಬಂಧಿಸಿದ ವಿಷಯಗಳ ಬಗೆಗೂ ಹುಸಿ ಸುದ್ದಿಗಳಿವೆ. ಹುಸಿ ಸುದ್ದಿಯನ್ನು ಹೊಸೆಯುವುದರಲ್ಲಿ ಪಾಗಲ್ ಪತ್ರಕರ್ತ ಅದೆಷ್ಟು ನಾಜೂಕೆಂದರೆ ಹಲವು ಸುದ್ದಿಗಳನ್ನು ಜನರು ಸತ್ಯವೆಂದೇ ಭಾವಿಸಿಬಿಟ್ಟಿದ್ದರು. ಉದಾಹರಣೆಗೆ:‌ axe ಡಿಯೋಡರೆಂಟ್ ಬಳಸಿದರೆ ಹುಡುಗಿಯರು ಮುಗಿ ಬೀಳುತ್ತಾರೆ ಎಂಬ ಜಾಹೀರಾತು ನೋಡಿ ಮೈಗೆಲ್ಲ ಡಿಯೋಡರೆಂಟ್ ಬಳಿದುಕೊಂಡು ಎಷ್ಟೇ ಪ್ರಯತ್ನಿಸಿದರೂ ಒಬ್ಬ ಹುಡಿಗಿಯೂ ತಿರುಗಿ ನೋಡದಿದ್ದಾಗ, ಮನೆಗೆಲಸದವಳೂ  ಮೂಗು ಮುರಿದಾಗ ಹತಾಶನಾಗಿ axe ಕಂಪೆನಿಯ ವಿರುದ್ಧವೇ ಕೇಸು ಹಾಕಿದ ಹುಸಿ ಸುದ್ದಿಯನ್ನು ಪ್ರಮುಖ ಅಂತರ್ಜಾಲ ಸುದ್ದಿತಾಣಗಳು ಯಥಾವತ್ತಾಗಿ ಪ್ರಕಟಿಸಿಬಿಟ್ಟಿದ್ದವು!

ಈ ತಾಣದಲ್ಲಿ ಹುಸಿ ಸುದ್ದಿಯ ಜೊತೆ  ಆಗ ಗಂಭೀರ ಬರಹಗಳೂ ಇರುತ್ತವೆ. ಹಿಂದಿ ಹಾಗೂ ಇಂಗ್ಲೀಷ್ ಸುದ್ದಿ ವಾಹಿನಿಗಳ ಕಾರ್ಯ ಕ್ಷಮತೆ ಹಾಗೂ ನೈತಿಕತೆಯ ಬಗ್ಗೆ ಪ್ರಬುದ್ಧವಾದ ಬರಹಗಳೂ ಪ್ರಕಟವಾಗುತ್ತವೆ.

ಮುಖ್ಯವಾಹಿನಿಯ ಮಾಧ್ಯಮಗಳು ಹುಸಿ ಸುದ್ದಿಯ ತಾಣಕ್ಕೆ ಪೈಪೋಟಿ ಒಡ್ಡುವ ಹಾಗೆ ವರದಿಗಳನ್ನು ಬಿತ್ತರಿಸುತ್ತಿರುವಾಗ `ಹುಸಿ ಸುದ್ದಿ’ಗಳು ಸತ್ಯವಾಗಿ ಕಂಡರೆ ನಾವು ಜವಾಬ್ದಾರರಲ್ಲ!

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 26 : ಸಿಲ್ಲಿ ಲಲ್ಲಿ

 

ಕನ್ನಡದ ಟಿವಿ ಚಾನಲುಗಳಲ್ಲು ಹಾಸ್ಯ ಧಾರಾವಾಹಿಯ ಜಮಾನ ಶುರುವಾಗಿದ್ದು ಯಾವ ಎಂದು ನೆನೆದರೆ ನೆನಪಾಗುವುದು ಪೀಚಲು ದೇಹದ ಗಂಡನನ್ನು ಬಾಲ್ಕನಿಯಿಂದ ಎಸೆಯುವ ದಢೂತಿ, ಘಟವಾಣಿ ಮಡದಿಯ ಕತೆಯ ‘ಪಾ.ಪ.ಪಾಂಡು’. ಕೌಟುಂಬಿಕ ಹಾಸ್ಯಕ್ಕೆ ಹೇಳಿ ಮಾಡಿಸಿದ ವಸ್ತುವಾದ ದಾಂಪತ್ಯವನ್ನು ಆಧಾರವಾಗಿಟ್ಟುಕೊಂಡು ಮೂಡಿಬಂದ ಈ ಧಾರಾವಾಹಿ ಬಹುಬೇಗ ಯಶಸ್ಸಿನ ಮೆಟ್ಟಿಲೇರಿತು. ಹಿರಿತೆರೆಯ ಹಾಸ್ಯದ ಪಾತ್ರಗಳಲ್ಲಿ ಪಳಗಿದ್ದ ಸಿಹಿ ಕಹಿ ಚಂದ್ರು ದಂಪತಿಗಳ ಫೈನಲ್ ಕಟ್ ಪ್ರೊಡಕ್ಷನ್‌ ನಿರ್ಮಾಣದ ಈ ಧಾರಾವಾಹಿಗೆ ಕತೆ, ಚಿತ್ರಕತೆ ಹಾಗೂ ಸಂಭಾಷಣೆ ಬರೆಯುತ್ತಿದ್ದವರು ಎಂ.ಎಸ್.ನರಸಿಂಹಮೂರ್ತಿ .

ಸೋಮವಾರದಿಂದ ಶುಕ್ರವಾರದವರೆಗೆ ಪ್ರಸಾರವಾಗುತ್ತಿದ್ದ ಧಾರಾವಾಹಿಗೆ ಪ್ರತಿದಿನ ಚಿತ್ರಕತೆ, ಸಂಭಾಷಣೆ ಬರೆಯುವುದು ಸುಲಭದ ಮಾತಲ್ಲ. ಸುಸಜ್ಜಿತವಾದ ಬರಹಗಾರರ ತಂಡವನ್ನೇ ಇಟ್ಟುಕೊಂಡು ಇಂಗ್ಲೀಷಿನ ‘ಸೈನ್‌ಫೆಲ್ಡ್’ನಂತಹ ಸಿಟ್‌ಕಾಮ್‌ಗಳು ವಾರಕ್ಕೊಂದು ಎಪಿಸೋಡ್ ನಿರ್ಮಿಸುತ್ತವೆ. ಪಾ.ಪ.ಪಾಂಡು ಯಶಸ್ಸಿನ ಶಿಖರವನ್ನೇರಿದ್ದ ಸಮಯದಲ್ಲೇ ಮುಖ್ಯಪಾತ್ರಧಾರಿ ಬದಲಾಗಿ ನಾನಾ ರೀತಿಯ ತೊಂದರೆಗಳಾದವು.

ಮೊದಲ ಯಶಸ್ಸು ಅತಿ ಅಪಾಯಕಾರಿಯಾದದ್ದು. ಅದರ ನೆರಳು ಮುಂದಿನ ಎಲ್ಲಾ ಪ್ರಯತ್ನಗಳ ಮೇಲೆ ಗಾಢವಾಗಿರುತ್ತದೆ. ಪಾ.ಪ ಪಾಂಡು ಯಶಸ್ಸಿನ ನಂತರ ಅದಕ್ಕಿಂತಲೂ ಹೆಚ್ಚಿನ ಮಟ್ಟದ ಜನಪ್ರಿಯತೆಯನ್ನು ಪಡೆದದ್ದು ಈ ಟಿವಿಯಲ್ಲಿಯೇ ಪ್ರಸಾರವಾದ, ಫೈನಲ್ ಕಟ್ ಪ್ರೊಡಕ್ಷನ್ನಿನದೇ ಕೊಡುಗೆಯಾದ ‘ಸಿಲ್ಲಿ ಲಲ್ಲಿ’. ಲವಲವಿಕೆಯ ಸಂಭಾಷಣೆ, ಐಕಾನಿಕ್ ಪಾತ್ರಗಳು, ಜಾಣ್ಮೆಯ ಚಿತ್ರಕತೆ ಇವುಗಳಿಂದ ವಿಠ್ಠಲ್‌ರಾವ್ ಸರ್ಜರಿ ಹಾಗೂ ಭರ್ಜರಿಯಲ್ಲಿ ಫೇಮಸ್ಸಾದಷ್ಟೇ ಸೀರಿಯಲ್ ಕೂಡ ಫೇಮಸ್ಸಾಯಿತು.

ಸಿಲ್ಲಿ ಲಲ್ಲಿ ಧಾರಾವಾಹಿಯ ಕೆಲವು ಎಪಿಸೋಡುಗಳನ್ನು ಆನ್ ಲೈನ್ ವೀಕ್ಷಿಸಲು ಇಲ್ಲಿ ಭೇಟಿ ನೀಡಬಹುದು. ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 25

ಒಂದು ಕಾಲದ ಅಮೇರಿಕಾದ ಅತಿ ಶ್ರೀಮಂತ ಸ್ಟ್ಯಾಂಡ್ ಅಪ್ ಕಮಿಡಿಯನ್ ಎಂಬ ಕೀರ್ತಿಗೆ ಪಾತ್ರವಾಗಿದ್ದ ಜೆರ್ರಿ ಸೈನ್ ಫೆಲ್ಡ್‌ನದ್ದು ದಿನನಿತ್ಯದ ಘಟನೆಗಳನ್ನು, ಸಣ್ಣ ಸಣ್ಣ ಸಂಗತಿಗಳನ್ನು ಹುಡುಕಿ ಅವುಗಳಲ್ಲಿ ಅಡಗಿರುವ ಅಸಂಬದ್ಧತೆ, ವಕ್ರತೆ, ವ್ಯಂಗ್ಯವನ್ನು ಹೊರತೆಗೆದು ನಗಿಸುವ ವಿಶಿಷ್ಟ ಹಾಸ್ಯ.

ಅಮೇರಿಕನ್ನರ ದೈನಂದಿನ ಬದುಕಿನಲ್ಲಿ ಅತಿ ಯಾಂತ್ರಿಕ ಭಾಗವಾದ ವಾಶಿಂಗ್ ಮಶೀನಿನೊಂದಿಗೆ ಕಳೆಯುವ ಸಮಯವನ್ನು ಕೂಡ ಹಾಸ್ಯದ ವಸ್ತುವನ್ನಾಗಿಸಿಕೊಳ್ಳಬಲ್ಲ. “ವಾಶಿಂಗ್ ಮಶೀನು ಬಟ್ಟೆಗಳ ಪಾಲಿಗೆ ನೈಟ್ ಪಾರ್ಟಿ ಇದ್ದ ಹಾಗೆ. ಬಟ್ಟೆಗಳಲ್ಲೆ ಒಟ್ಟಿಗೆ ಸೇರುವುದು ಅಲ್ಲಿ ಮಾತ್ರ. ಮಶೀನಿನ ಸ್ವಿಚ್ಚು ಅದುಮುತ್ತಿದ್ದ ಹಾಗೆ ಲೋಕವೇ ತಿರುಗಲು ಶುರುವಾಗುತ್ತೆ. ಶರ್ಟು ಸ್ಕರ್ಟಿನ ಜೊತೆ ಡ್ಯಾನ್ಸ್ ಮಾಡಲು ಶುರು ಮಾಡುತ್ತದೆ, ಪ್ಯಾಂಟು ಕೋಟಿನೊಂದಿಗೆ ಬೆಸೆದುಕೊಳ್ಳುತ್ತದೆ. ಈ ಮಳ್ಳನಂತಹ ಸಾಕ್ಸು ಮಾತ್ರ ತಾನು ತಪ್ಪಿಸಿಕೊಳ್ಳಲು ಇದೇ ಸುವರ್ಣಾವಕಾಶ ಎಂಬಂತೆ ಹಾರಿ ಹಾರಿ ಕಾಣದ ಜಾಗವನ್ನು ತಲುಪಿಕೊಳ್ಳುತ್ತೆ” ಎಂಬ ರೀತಿಯ ಹಾಸ್ಯವನ್ನು ಆತನಷ್ಟೇ ಮಾಡಬಲ್ಲ.

ಸ್ಟ್ಯಾಂಡ್ ಕಾಮಿಡಿಯಲ್ಲಿ ಹೆಸರುವಾಸಿಯಾದ ಸೈನ್‌ಫೆಲ್ಡ್ ಮುಂದೆ ಲ್ಯಾರಿ ಡೇವಿಡ್‌ನೊಡಗೂಡಿ ತನ್ನ ಹೆಸರಿನಲ್ಲೇ ಒಂದು ಕಾಮಿಡಿ ಶೋ ನಿರ್ಮಿಸಿದ. ತಾನೇ ನಿರ್ಮಾಪಕನಾಗಿ, ನಿರ್ದೇಶಕನಾಗಿ ನಿರ್ಮಿಸಿದ ‘ಸೈನ್ ಫೆಲ್ಡ್’ ಎನ್ನುವ ಟಿವಿ ಕಾರ್ಯಕ್ರಮದಲ್ಲಿ ತಾನೇ ಮುಖ್ಯ ಪಾತ್ರವನ್ನೂ ನಿರ್ಮಿಸಿದ. ತನ್ನ ಪಾತ್ರದಲ್ಲಿನ ಅಭಿನಯಕ್ಕಾಗಿ ಬಹುಮಾನ,ಮನ್ನಣೆಗಳನ್ನೂ ಗಳಿಸಿಕೊಂಡ. ಸೈನ್ ಫೆಲ್ಡ್ ಟಿವಿ ಕಾರ್ಯಕ್ರಮವು ಜನಪ್ರಿಯವಾಗಿ ಒಂಬತ್ತು ಸೀಸನ್‌ಗಳಷ್ಟು ಪ್ರಸಾರವಾಗಿದೆ.

ಸೈನ್ ಫೆಲ್ಡ್ ಸ್ಟ್ಯಾಂಡ್ ಅಪ್ ಕಾಮಿಡಿಯ ಒಂದು ತುಣುಕು ಈ ಸಂಚಿಕೆಯ ನಮ್ಮ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 24

ಅಂತರ್ಜಾಲವೆಂಬ ಸಾಗರದಲ್ಲಿ ಈಜಿ ಅಪರೂಪದ ದ್ವೀಪಗಳನ್ನು ತಲುಪಿಕೊಳ್ಳುವುದು ಪ್ರಯಾಸದ ಕೆಲಸ. ಒಮ್ಮೆ ಹಾಗೆ ಕಂಡ ನಗೆ ದ್ವೀಪಗಳನ್ನು ಸಹಮನಸ್ಕರಿಗೆ ಪರಿಚಯಿಸುವ ಘನೋದ್ದೇಶದಿಂದ ಸಾಮ್ರಾಟರು ತೆರೆದಿರುವ ಅಂಕಣವಿದು.

ಐವತ್ಮೂರು ವರ್ಷದ ಅಮೇರಿಕಾದ ಕಮಿಡಿಯನ್ ಬಿಲ್ ಮಹರ್ ಒಳ್ಳೆಯ ರಾಜಕೀಯ ವಿಶ್ಲೇಷಕನೂ ಹೌದು. ಇತ್ತೀಚೆಗೆ ಎಚ್.ಬಿ.ಒ ಚಾನೆಲ್ಲಿಗಾಗಿ ರಿಯಲ್ ಟೈಮ್ ಎನ್ನುವ ಟಿವಿ ಕಾರ್ಯಕ್ರಮ ಮಾಡಿಕೊಡುತ್ತಿರುವ ಮಹರ್, ಅದರಲ್ಲಿ ಸಮಕಾಲೀನ ರಾಜಕೀಯ ವಿದ್ಯಮಾನಗಳ ಬಗ್ಗೆ ವಿಶ್ಲೇಷಣೆ ಹಾಗೂ ವಿಡಂಬನೆ ಮಾಡುತ್ತಾನೆ.

೧೯೫೬ರ ಜನವರಿ ಇಪ್ಪತ್ತರಂದು ಅಮೇರಿಕಾದಲ್ಲಿ ಜನಿಸಿದ ಈತ ಸ್ಟ್ಡ್ಯಾಂಡ್ ಅಪ್ ಕಾಮಿಡಿ ಮೂಲಕ ಗುರುತಿಸಿಕೊಂಡವನು. ಅನಂತರ ಅನೇಕ ಹಾಸ್ಯಪ್ರಧಾನವಾದ ಟಿವಿ ಟಾಕ್ ಶೋಗಳನ್ನು ನಡೆಸಿಕೊಟ್ಟ. ಸಾಮಾಜಿಕ ಹಾಗೂ ರಾಜಕೀಯ ವಿದ್ಯಮಾನಗಳ ವಿಡಂಬನೆಯನ್ನು ಮಾಡುವ ‘ಪೊಲಿಟಿಕಲಿ ಇನ್ ಕರೆಕ್ಟ್’ ಎಂಬ ಟಾಕ್ ಶೋವನ್ನು ಮೊದಲಿಗೆ ಕಾಮಿಡಿ ಸೆಂಟ್ರಲ್ ವಾಹಿನಿಗಾಗಿ ಅನಂತರ ಎಬಿಸಿಗಾಗಿ ನಡೆಸಿಕೊಡುತ್ತಿದ್ದ.

ತನ್ನ ಹರಿತವಾದ ರಾಜಕೀಯ ವಿಡಂಬನೆಗಳಿಗೆ ಹೆಸರಾಗಿರುವ ಈತ ಸ್ಪಷ್ಟವಾದ ರಾಜಕೀಯ ನಿಲುವುಗಳನ್ನೂ ಹೊಂದಿದ್ದಾನೆ. ಅಮೇರಿಕಾದ ಎಡಪಂಥೀಯ ರಾಜಕೀಯ ಪಕ್ಷವನ್ನು ಈತ ಬೆಂಬಲಿಸುತ್ತಾನೆ. ಮರಿಜುವಾನವನ್ನು ಸಕ್ರಮಗೊಳಿಸುವುದರ ಪರವಾಗಿ ಈತ ಬೆಂಬಲ ನೀಡಿದ್ದಾನೆ. ಪ್ರಾಣಿಗಳ ಹಕ್ಕು ರಕ್ಷಣೆಗೆ ಒತ್ತಾಯಿಸುವ ಪೀಟಾ ಸಂಸ್ಥೆಗೆ ಬೆಂಬಲಿಸಿದ್ದಾನೆ. ಸಲಿಂಗಿಗಳ ಹಕ್ಕು ರಕ್ಷಣೆಯ ಹೋರಾಟಕ್ಕೆ ಈತನ ಬೆಂಬಲವಿದೆ.

೨೦೦೮ರಲ್ಲಿ ಸ್ಥಾಪಿತ ಧರ್ಮಗಳನ್ನು ಲೇವಡಿ ಮಾಡುವ, ಮೂಢ ನಂಬಿಕೆಗಳನ್ನು, ಧಾರ್ಮಿಕ ಶ್ರದ್ಧೆಗಳನ್ನು ವಿಡಂಬನೆಗೆ ಒಳಪಡಿಸುವ ಈತನ ಚಿತ್ರ ‘ರಿಲಿಜುಲಸ್’ ಬಿಡುಗಡೆಯಾಗಿತ್ತು. Religion ಹಾಗೂ ridiculous ಪದಗಳ ಸಂಯೋಗದಿಂದ ಹುಟ್ಟಿದ ಹೊಸ ಪದದವನ್ನು ಸಿನೆಮಾ ಹೆಸರಾಗಿ ಬಳಸಲಾಗಿದೆ. ಇದರಲ್ಲಿ ಮಹರ್ ಜಗತ್ತಿನ ಪ್ರಮುಖ ಧರ್ಮಗಳನ್ನು, ಅವರ ಧಾರ್ಮಿಕ ನಂಬಿಕೆಗಳನ್ನು ತೀಕ್ಷ್ಣವಾದ ಗೇಲಿಗೆ ಒಳಪಡಿಸಿದ್ದಾನೆ.

ಈತನ ಸ್ಡ್ಯಾಂಡ್ ಅಪ್ ಕಾಮಿಡಿಯ ತುಣುಕನ್ನು ಸಾಮ್ರಾಟರು ಈ ಸಂಚಿಕೆಯಲ್ಲಿ ರೆಕಮಂಡ್ ಮಾಡುತ್ತಿದ್ದಾರೆ.

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್! ಹೇಗಿದೆ ಎಂದು ತಿಳಿಸುತ್ತೀರಲ್ಲ?

ನಗಾರಿ ರೆಕಮಂಡೇಶನ್ 23

ಅವನದೆಂತಹ ಶ್ರೇಷ್ಠ ವಿಜ್ಞಾನಿಯೇ ಆಗಲಿ, ಆತನಿಂದ ಕಾಲ್ಪನಿಕ ವ್ಯಕ್ತಿಯನ್ನು, ವಸ್ತುವನ್ನು ಇಲ್ಲ ಎಂದು ಸಾಬೀತು ಮಾಡಲಿಕ್ಕೆ ಸಾಧ್ಯವಿಲ್ಲ ಎನ್ನುತ್ತದೆ ತರ್ಕ.

ಇದನ್ನು ವಿವರಿಸಲು ಖ್ಯಾತ ದಾರ್ಶನಿಕ ಬರ್ಟ್ರಂಡ್ ರಸೆಲ್ ಭೂಮಿಯ ಸುತ್ತಲಿನ ಕಕ್ಷೆಯಲ್ಲಿ ಟೀ ಪಾಟ್ ಒಂದು ಸುತ್ತುತ್ತಿದೆ ಎಂದ. ಅದನ್ನು ಅಲ್ಲಗಳೆಯಲು ಸಾಧವೇ ಇರಲಿಲ್ಲ. ಆದರೆ ಮನುಷ್ಯ ಅಂತರಿಕ್ಷಕ್ಕೆ ಜಿಗಿಯುವಲ್ಲಿ ಸಫಲನಾಗಿ, ಭೂಕಕ್ಷೆಯಲ್ಲಿ ಟೀ ಪಾಟ್ ಅಷ್ಟೇ ಏಕೆ ದೊಡ್ಡ ಉಪಗ್ರಹವನ್ನೇ ಇಡಬಲ್ಲವನಾದಾಗ ರಸೆಲ್ ಮಾತನ್ನು ಸುಳ್ಳು ಎಂದು ಸಾಬೀತು ಮಾಡಲು ಅವಕಾಶವಾಯಿತು.

ಆದರೆ ರಸೆಲ್ ಈಗ ಬದುಕಿದ್ದರೆ ತನ್ನ ಪ್ರಶ್ನೆಯಲ್ಲಿ ಸಣ್ಣ ಮಾರ್ಪಾಡು ಮಾಡಿ ಭೂಕಕ್ಷೆಯಲ್ಲಿ ಕಣ್ಣಿಗೆ ಕಾಣದ, ವಾಸನೆಯಿಲ್ಲದ, ಸದ್ದು ಹೊರಡಿಸದ, ರೆಡಾರ್ ಗಮನಕ್ಕೆ ಬಾರದ, ವಿಕಿರಣ ಹೊರಸೂಸದ ಟೀ ಪಾಟ್ ಸುತ್ತುತ್ತಿದೆ ಎನ್ನುತ್ತಿದ್ದನೇನೋ!

ಇರಲಿ, ಇವೆಲ್ಲ ಪೀಠಿಕೆ ಪ್ರಸ್ತಾವನೆಯ ಅಗತ್ಯವೇನೆಂದರೆ, ನಮ್ಮ ಈ ಸಂಚಿಕೆಯ ರೆಕಮಂಡೇಶನ್ ಜಗತ್ತಿನಲ್ಲೇ ಅತಿ ವಿವಾದಾಸ್ಪದ ವ್ಯಕ್ತಿಗೆ ಸಂಬಂಧಿಸಿದ್ದು. ವಿವಾದ ಹುಟ್ಟಿಕೊಳ್ಳುವುದಕ್ಕೆ ಖುದ್ದು ಆ ವ್ಯಕ್ತಿಯು ಏನನ್ನೂ ಮಾಡಿಲ್ಲವಾದರೂ ಆತನ ಸುತ್ತಲಿರುವ ವಿವಾದದ ಶಾಖ ಅತಿ ಪ್ರಬಲವಾದದ್ದು. ಈ ವಿವಾದ ನಮ್ಮ ಟಿವಿ ‘ಸಚ್ಕಾ ಸಾಮ್ನಾ’ ಆಗುವುದಕ್ಕೆ ಮುಂಚಿನಿಂದಲೂ ಜೀವಂತವಾಗಿದೆ ಎಂದರೆ ಅದೆಷ್ಟು ಪ್ರಾಚೀನವಾದದ್ದು ಹಾಗೂ ಜನಪ್ರಿಯವಾದದ್ದು ಎನ್ನುವುದು ಅರಿವಾಗುತ್ತದೆ.

ಹೌದು! ನಿಮ್ಮ ಊಹೆ ಸರಿಯೇ. ಆತ ಆ ದೇವರು.

ದೇವರು ಹೇಗಿದ್ದಾನೆ, ಆತನ ರೂಪ ಯಾವುದು, ಆತನ ಲಿಂಗ ಯಾವುದು, ಆತ ಯಾರನ್ನು ಸ್ವರ್ಗಕ್ಕೆ ಕಳುಹಿಸುತ್ತಾನೆ, ಯಾರನ್ನು ನರಕಕ್ಕೆ ಅಟ್ಟುತ್ತಾನೆ ಎಂಬಿತ್ಯಾದಿ ಪ್ರಶ್ನೆಗಳು ಸರಕಾರಿ ಕಛೇರಿಯ ಗುಮಾಸ್ತರಿದ್ದ ಹಾಗೆ ಎಷ್ಟು ತುರುಕಿದರೂ ತೃಪ್ತವಾಗುವುದಿಲ್ಲ. ಈ ಪ್ರಶ್ನೆಗಳ ಗುಮಾಸ್ತರ ಹೊಟ್ಟೆ ತಣಿಸುವ ಹೊಸ ಪ್ರಯತ್ನ ಸಂಪದ ಸಮುದಾಯ ತಾಣದಲ್ಲಿ ಸುಪ್ರೀತ್.ಕೆ.ಎಸ್ ಎಂಬುವವರು ನಡೆಸುತ್ತಿದ್ದಾರೆ.

ಒಂದು ಎಚ್ಚರ: ಈ ರೆಕಮಂಡೇಶನ್  ಬುದ್ಧಿವಂತರಿಗೆ ಮಾತ್ರ. ಇದನ್ನು ಓದುವುದರಿಂದುಂಟಾಗುವ ಮಾನಸಿಕ ಕ್ಲೇಷಾದಿಗಳಿಗೆ ನಾವು ಜವಾಬ್ದಾರರಲ್ಲ.

ಸ್ವಘಟ್ಟಿ ತತ್ವಚಿಂತನೆಯ ಸ್ಯಾಂಪಲ್ ನಗಾರಿ ಸಾಮ್ರಾಜ್ಯದ ಪ್ರಜೆಗಳಿಗಾಗಿ:

ಈ ಜಗತ್ತಿನಲ್ಲಿ ಸ್ವಘಟ್ಟಿ  ಎಂಬ ಮೂರು ಕೈಗಳ, ನಾಲ್ಕು ನಾಲಿಗೆಗಳ, ಎರಡು ತಲೆಗಳ, ಹದಿನಾರು ಕಿಡ್ನಿಗಳ ಮನುಷ್ಯ  ಇಲ್ಲವೇ ಇಲ್ಲ ಎನ್ನುವುದು ಅನಾಗರೀಕರಾದ, ಕಾಮನ್ ಸೆನ್ಸ್ ಇಲ್ಲದ, ವಿತಂಡ ವಾದಿಗಳಾದ, ನರಕವನ್ನೇ ಭವಿಷ್ಯವನ್ನಾಗಿ ಹೊಂದಿರುವ ನಾಸ್ತಿಕರ ವಾದ. ಇವರು ನಮ್ಮೆಲ್ಲರನ್ನು ಕಾಯುವ, ತನ್ನ ಹದಿನಾಲ್ಕು ಕಿಡ್ನಿಗಳಿಂದ ನಮ್ಮ ಪಾಪಗಳನ್ನು ಶುದ್ಧೀಕರಿಸಿ ಜಗತ್ತನ್ನು ಉದ್ಧಾರ ಮಾಡುವ ಸ್ಬಘಟ್ಟಿಯ ಅಸ್ತಿತ್ವವನ್ನೇ ಪ್ರಶ್ನಿಸುತ್ತಾರೆ. ಉದ್ದುದ್ದ ಭಾಷಣ ಚಚ್ಚುತ್ತಾರೆ. 

ಇವರಿಗೆ ಸ್ವಘಟ್ಟಿಯ ಮಹಿಮೆಯ ಬಗ್ಗೆ ಆತನ ಮೂರು ಕೈಯ ವೈಶಿಷ್ಟ್ಯದ ಬಗ್ಗೆ ಹೇಳಲು ಹೋದರೆ, ಸ್ವಘಟ್ಟಿಯನ್ನು ಆರಾಧಿಸಿ ಎನ್ನಲು ಹೋದರೆ ಸ್ವಘಟ್ಟಿ ಇರುವುದಕ್ಕೆ ಸಾಧ್ಯವೇ ಇಲ್ಲ. ಆತ ಇದ್ದಾನೆ ಎನ್ನುವುದಕ್ಕೆ ಸಾಕ್ಷಿ ಕೊಡು ಎನ್ನುತ್ತಾರೆ. ಮನುಷ್ಯನಿಗೆ ಎರಡು ಕೈ ಒಂದು ತಲೆ, ಒಂದು ನಾಲಿಗೆ ಇರುತ್ತೆ(ಕೆಲವರು ಅದನ್ನು ಎರಡಾಗಿ ಬಳಸುತ್ತಾರೆ) , ಎರಡು ಕಿಡ್ನಿಗಳಿರುತ್ತೆ(ಕೆಲವರ ಒಂದು ಕಿಡ್ನಿ ಮಾರಾಟವಾಗಿರುತ್ತೆ) – ಸ್ವಘಟ್ಟಿಯಂಥ ಮನುಷ್ಯ ಇರುವುದಕ್ಕೆ ಯಾವ ಸಾಕ್ಷಿಯೂ ಇಲ್ಲ. ಆತ ಇದ್ದಾನೆ ಎನ್ನುವುದಕ್ಕೆ ನೀವೇನಾದರೂ ಅವನನ್ನು ನೋಡಿದ್ದೀರಾ ಎಂದು ಉದ್ಧಟತನದ ಮಾತನಾಡುತ್ತಾರೆ.

ಸ್ವಘಟ್ಟಿಯನ್ನು ನಮ್ಮ ಮನದಾಳದಲ್ಲಿ ಸ್ಥಾಪಿಸಿಕೊಂಡು ಪ್ರತಿದಿನ ಆತನ ಮೂರು ನಾಲಿಗೆಗಳಲ್ಲಿ ಮೆದುಳನ್ನು  ನೆಕ್ಕಿಸಿಕೊಳುವ ನಾವೇನು ಆತನನ್ನು ನೋಡಿಲ್ಲ. ಆತನನ್ನು ನಮ್ಮ ಮುತ್ತಾತನ ಮುತ್ತಾತನ ಮುತ್ತಾತ ಕಂಡಿದ್ದನಂತೆ.

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 22

ವಿಲಿಯಂ ಹೆನ್ರಿ ಬಿಲ್ ಕಾಸ್ಬಿ ಅಮೇರಿಕಾದ ಖ್ಯಾತ ನಗೆಗಾರ, ನಟ, ಲೇಖಕ, ಟಿವಿ ನಿರ್ಮಾಪಕ, ಸಂಗೀತಗಾರ ಹಾಗೂ ಹೋರಾಟಗಾರ. ಅಮೇರಿಕಾ ತನ್ನ  ವರ್ಣನೀತಿಯನ್ನು ಬದಲಾಯಿಸಿಕೊಂಡು ಸರ್ವರಿಗೂ ಸಮಬಾಳೆಂಬ ತತ್ವವನ್ನು ಜಾರಿಗೆ ತಂದಾಗ ತಮ್ಮ ಕನಸುಗಳನ್ನು ನನಸಾಗಿಸಿಕೊಂಡ ಅನೇಕ ಆಫ್ರಿಕನ್ ಅಮೇರಿಕನ್ ಕಲಾವಿದರಲ್ಲಿ ಕಾಸ್ಬಿ ಒಬ್ಬ.

ತನ್ನ ವೃತ್ತಿ ಜೀವನವನ್ನು ಸ್ಟ್ಯಾಂಡ್ ಅಪ್ ಕಾಮಿಡಿಯಿಂದ ಶುರು ಮಾಡಿದ ಕಾಸ್ಬಿಗೆ ಅತಿ ಹೆಚ್ಚಿನ ಪ್ರಸಿದ್ಧಿ ಸಿಕ್ಕಿದ್ದು ಜೇಮ್ಸ್ ಬಾಂಡ್ ಸಿನೆಮಾಗಳನ್ನು ಹೋಲುವ ‘ಐ ಸ್ಪೈ’ ಎಂಬ ಟಿವಿ ಶೋ ನಲ್ಲಿನ ಪಾತ್ರದಿಂದ.

ಮುಂದೆ ತನ್ನದೇ ಟಿವಿ ಕಾರ್ಯಕ್ರಮ, ‘ತದಿ ಬಿಲ್ ಕಾಸ್ಬಿ ಶೋ’ ಶುರುಮಾಡಿದ ಈತ ಅಮೇರಿಕಾದ ಜನ ಮಾನಸದಲ್ಲಿ ತನ್ನ ಅಭಿನಯ ಹಾಗೂ ಹಾಸ್ಯ ಪ್ರವೃತ್ತಿಯ ಮೂಲಕ ಸ್ಥಾನ ಗಿಟ್ಟಿಸಿಕೊಂಡ. ಮಕ್ಕಳಿಗೆ ಮನರಂಜನೆಯ ಮೂಲಕ ಹೇಗೆ ಶಿಕ್ಷಣವನ್ನು ಕೊಡಬಹುದು ಎಂದು ಈತ ಅಧ್ಯಯನ ಮಾಡಿ ರೂಪಿಸಿದ ಫ್ಯಾಟ್ ಆಲ್ಬರ್ಟ್ ಅಂಡ್ ದಿ ಕಾಸ್ಬಿ ಕಿಡ್ಸ್ ಕಾರ್ಟೂನ್ ಸರಣಿಗಳು ಜನಪ್ರಿಯವಾದವು. ಈ ಸರಣಿ ಕಾರ್ಯಕ್ರಮದ ರೂಪು ರೇಷೆ ಹಾಗೂ ಮಕ್ಕಳ ಶೈಕ್ಷಣಿಕ ಪ್ರಗತಿಗೆ ಅದನ್ನು ಬಳಸುವ ರೀತಿಯನ್ನು ವಿಶ್ಲೇಷಿಸಿ ಆತ ಮಂಡಿಸಿದ ಸಂಶೋಧನಾ ಬರಹಕ್ಕೆ ಮೆಸಾಚುಸೆಟ್ಸ್ ವಿಶ್ವವಿದ್ಯಾಲಯ ಎಡ್.ಡಿ ಪದವಿಯನ್ನು ನೀಡಿ ಗೌರವಿಸಿತು.

ಸಾಮಾನ್ಯ ಪ್ರದರ್ಶನ ಕಲಾವಿದನಾಗಿ ವೃತ್ತಿ ಆರಂಭಿಸಿದ ಬಿಲ್ ಕಾಸ್ಬಿಯ ಒಟ್ಟು ಸಂಪತ್ತು ಈಗ ಮುನ್ನೂರು ಮಿಲಿಯನ್ ಡಾಲರುಗಳು. ತನ್ನ ವಿಶಿಷ್ಟ ವ್ಯಕ್ತಿತ್ವದಿಂದ ‘ಅಮೇರಿಕಾದ ಡ್ಯಾಡ್’ ಎಂದು ಕರೆಯಲ್ಪಟ್ಟವ ಈತ.

ಈತನ ಒಂದು ಸ್ಟ್ಯಾಂಡ್ ಅಪ್ ಕಾಮಿಡಿಯ ತುಣುಕು ಈ ಸಂಚಿಕೆ ರೆಕಮಂಡೇಶನ್. ಇದರಲ್ಲಿ ಕಾಸ್ಬಿ ಕುಡುಕರ ಹಾವಭಾವಗಳನ್ನು, ಕುಡಿತದ ಪರಿಣಾಮಗಳನ್ನು ಬಹಳಾ ರಂಜನೀಯವಾಗಿ ವಿಡಂಬಿಸಿದ್ದಾರೆ.

ಇದು ನಿಮ್ಮ ಖುಶಿಗೆ. ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ – 21

 

ಅಂತರ್ಜಾಲವೆಂಬ ಮಾಹಿತಿಯ ಆಗರದಲ್ಲಿ ಅಲೆದಾಡುವ ನಮಗೆ ಕಂಡ ನಗೆ ಬುಗ್ಗೆಗಳನ್ನು ನಮ್ಮ ಸಾಮ್ರಾಜ್ಯದ ವಿನಮ್ರ ಪ್ರಜೆಗಳೊಂದಿಗೆ ಹಂಚಿಕೊಳ್ಳುವ ಅಂಕಣವಿದು. ನೀವು ಕಂಡ ನಗೆಯುಕ್ಕಿಸುವ ಸಂಗತಿಗಳನ್ನು (ಅವು ವೆಬ್ ಸೈಟ್ ಆಗಿರಬಹುದು, ಯು ಟ್ಯೂಬಿನ ವಿಡಿಯೋಗಳಾಗಿರಬಹುದು) ಹಂಚಿಕೊಳ್ಳಲು ಇಲ್ಲೊಂದು ಕಮೆಂಟು ಹಾಕಿ ಸಾಕು.

ಪ್ರಜಾವಾಣಿ, ವಿಜಯ ಕರ್ನಾಟಕ, ಸಂಯುಕ್ತ ಕರ್ನಾಟಕ ದಿನಪತ್ರಿಕೆಗಳಲ್ಲದೆ ಹಾಯ್ ಬೆಂಗಳೂರು, ಕಸ್ತೂರಿ, ಸುದ್ದಿ ಸಂಗಾತಿಗಳಲ್ಲಿ ಹಾಸ್ಯ ಅಂಕಣಗಳನ್ನು ನಿರ್ವಹಿಸುತ್ತಿದ್ದ ಎಚ್. ಆನಂದರಾಮ ಶಾಸ್ತ್ರಿಯವರ  ಬ್ಲಾಗ್ ಅಕೌಂಟು ‘ಸಂಪದ’ದಲ್ಲಿದೆ.

ಹಾಸ್ಯದ ಬಗ್ಗೆ ಶಾಸ್ತ್ರಿಯವರು ಬರೆದ  ಸೊಗಸಾದ ಲೇಖನವೊಂದು ಇಲ್ಲಿದೆ. ಆ ಲೇಖನದ ತುಣುಕು ನಗೆ ನಗಾರಿಗಾಗಿ:

ಇಂದು ’ಮೂರ್ಖರ ದಿನ’. ಹಾಸ್ಯಕ್ಕೂ ಮೂರ್ಖತನಕ್ಕೂ ಸಂಬಂಧ ಕಲ್ಪಿಸುವ ದಿನ! ಹೀಗೆ ಸಂಬಂಧ ಕಲ್ಪಿಸುವುದೇ ಒಂದು ರೀತಿಯಲ್ಲಿ ಮೂರ್ಖತನ!
ಹಾಸ್ಯವೆಂಬುದು ಜಾಣರಿಂದ, ಜಾಣರಿಗಾಗಿ ಇರುವ ಜಾಣತನ. ಯಾರನ್ನಾದರೂ ಈ ದಿನ ನಾವು ’ಮೂರ್ಖ’ರನ್ನಾಗಿಸಲು, ಅರ್ಥಾತ್ ಬೇಸ್ತುಬೀಳಿಸಲು ಜಾಣತನವನ್ನೇನೋ ಉಪಯೋಗಿಸಬೇಕು, ಸರಿಯೇ, ಆದರೆ ಆ ಜಾಣತನವು ಮೋಸವೇ ಹೊರತು ಹಾಸ್ಯವಲ್ಲ. ಹಲವು ಸಲ ಅದು ಅಪಹಾಸ್ಯ!

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!

ನಗಾರಿ ರೆಕಮಂಡೇಶನ್ 20

ಚಾರ್ಲ್ಸ್ ಸ್ಪೆನ್ಸರ್ ಚಾಪ್ಲಿನ್!

ಹ್ಹ! ನಿಲ್ಲಿ ನಾವು ಆತನ ಹೆಸರು, ಆತನ ಪೋಷಾಕು, ಆತನ ವಿಗ್ರಹ ಬಳಸಿ ಯಾವುದೇ ವಿವಾದ ಪಡೆಯುವ ಹುನ್ನಾರ ನಡೆಸುತ್ತಿಲ್ಲ. ಆ ರೀತಿಯ ವಿವಾದ ಸೃಷ್ಟಿಸಿ ಈಗಾಗಲೇ ನಿರ್ವಹಿಸಲಾಗದಷ್ಟು ಬೆಳೆದು ನಿಂತಿರುವ ನಮ್ಮ ಜನಪ್ರಿಯತೆಯನ್ನು ಹೆಚ್ಚಿಸಿಕೊಳ್ಳುವ ಇರಾದೆಯನ್ನೂ ಹೊಂದಿಲ್ಲ.

ಕರ್ನಾಟಕದಲ್ಲಿ ಹುಟ್ಟಿ ರಾಜ್ ಕುಮಾರ್ ಹೆಸರು ಕೇಳಿಲ್ಲ, ಭಾರತದಲ್ಲಿ ಹುಟ್ಟಿ ಗಾಂಧಿ ತಾತ ಗೊತ್ತಿಲ್ಲ ಎನ್ನುವವರನ್ನು ಕಾಣಲು ಹೇಗೆ ಸಾಧ್ಯವಿಲ್ಲವೋ ಹಾಗೆಯೇ ಈ ಜಾಗತಿಕ ‘ನಗೆ ಸಾಮ್ರಾಟ’ಚಾಪ್ಲಿನ್‌ನ ಬಗ್ಗೆ ಕೇಳದವರು ನಮಗೆ ಸಿಕ್ಕುವುದಿಲ್ಲ.

ಚಾಪ್ಲಿನ್ ಮನುಷ್ಯ ಈ ಭೂಮಿಯ ಮೇಲೆ ಮಾಡಬಹುದಾದ ಅತಿ ದೊಡ್ಡ ಸಾಧನೆಯೆಂದರೆ ನಗು ನಗುತ್ತಾ ಬಾಳುವುದು ಎಂಬುದನ್ನು ತೋರಿಸಿಕೊಟ್ಟವನು. ಎಲ್ಲಾ ಸಮಸ್ಯೆಗಳಿಗೂ ನಗುವಿನ ಪರಿಹಾರವನ್ನು ಕಾಣಿಸಿದವನು. ನಗು ಅರಳುವುದು ಕ್ರೌರ್ಯವಿಲ್ಲದ ಮುಗ್ಧ ಮನಸ್ಸಿನಲ್ಲಿ ಎಂಬುದು ಆತನ ಭಿಕಾರಿ ಪಾತ್ರದ ಪ್ರತಿ ಚಲನವಲನಗಳಲ್ಲೂ ಎದ್ದು ತೋರುತ್ತದೆ.

ಈ ಸಂಚಿಕೆಯಲ್ಲಿ ನಗೆಗಾರರ ಸಾಮ್ರಾಟನಾದ ಚಾರ್ಲಿ ಚಾಪ್ಲಿನ್ನನ ಸಿನೆಮಾದ ಒಂದು ತುಣುಕು.

ಹೊಟೇಲಿನಲ್ಲಿ ಹಾಡಿ ಕುಣಿಯಬೇಕಾಗಿರುತ್ತದೆ. ನಾಯಕಿ ಬರೆದುಕೊಟ್ಟ ಹಾಡಿನ ಚೀಟಿ ಕಳೆದು ಹೋಗುತ್ತೆ. ಪದಗಳು, ಅರ್ಥಗಳು, ವಾಕ್ಯಗಳು, ಸಾಹಿತ್ಯದ ಹಂಗಿಲ್ಲದೆ ನಾನು ನಗಿಸಬಲ್ಲೆ, ಕಲೆಗೆ ಅವೆಲ್ಲ ಪೂರಕವೇ ಹೊರತು ಅವೇ ಕಲೆಯಲ್ಲ ಎಂದು ಹೊಟ್ಟೆ ಹುಣ್ಣಾಗುವ ರೀತಿಯಲ್ಲಿ ವಿಷದ ಪಡಿಸುವ ಚಾಪ್ಲಿನ್ ನಮ್ಮನ್ನು ರಂಜಿಸುವುದರಲ್ಲಿ ಸೋಲುವುದಿಲ್ಲ.

ಇದು ಈ ಸಂಚಿಕೆಯ ನಗಾರಿ ರೆಕಮಂಡೇಶನ್!