ಪರಿಚಯ

ನಗುವುದರಿಂದ ನಿಮ್ಮ ಮುಖದ ಸ್ನಾಯುಗಳು ಸಡಿಲಾಗುತ್ತವೆ. ನಗುವುದರಿಂದ ರಕ್ತ ಸಂಚಾರ ಸರಾಗವಾಗುತ್ತದೆ. ನಗೆಯು ಹೃದಯವನ್ನು ಆರೋಗ್ಯವಾಗಿಡುತ್ತದೆ. ನಕ್ಕರೆ ಕೊಲೆಸ್ಟ್ರಾಲ್ ಕಡಿಮೆಯಾಗುತ್ತದೆ ಎಂದೆಲ್ಲಾ ವ್ಯಾಪಾರಿಯ ಹಾಗೆ ನಗುವಿನ ಗುಣಗಾನ ಮಾಡುವುದೇ ದೊಡ್ಡ ಹಾಸ್ಯವಾಗಿ ನಮಗೆ ಕಂಡ ದಿನ ನಾವು ನಗೆ ನಗಾರಿ ಡಾಟ್ ಕಾಮ್ ಪ್ರಾರಂಭಿಸುವ ಮನಸ್ಸು ಮಾಡಿದ್ದು.

ನಗು ಎನ್ನುವುದು ಈಗಿನ ದಿಡೀರ್ ದೋಸೆಯ ಕಾಲದಲ್ಲಿ ಆರೋಗ್ಯವರ್ಧಕ  ಬಹುಪಯೋಗಿ ವಸ್ತುವಾಗಿದೆ. ಆದರೆ ನಿಜಕ್ಕೂ ನಗು ಎನ್ನುವುದು ಒಂದು ಮನೋಧರ್ಮ. ಅದು ಒಂದು ಚಿಂತನ ಕ್ರಮ. ತನ್ನಷ್ಟಕ್ಕೆ ತಾನೇ ಅದೊಂದು ಸ್ವತಂತ್ರವಾದ ತತ್ವಶಾಸ್ತ್ರ.

ಬಾಲಿಶವಾದ ಸಂಗತಿಗಳನ್ನು ಅವಹೇಳನ ಮಾಡುವುದು, ಕುರೂಪ, ವಿಕಾರ, ವಕ್ರತೆಗಳನ್ನು ಬಿಂಬಿಸಿ ನಗೆಯುಕ್ಕಿಸುವುದು ನಗುವಿನ ಏಣಿಯ ಪ್ರಾರಂಭದ  ಮೆಟ್ಟಿಲುಗಳೇ ಸರಿ. ಆದರೆ ನಗು ಎನ್ನುವುದು ಅಲ್ಲಿಗೇ ನಿಲ್ಲುವಂಥದ್ದಲ್ಲ. ಸುತ್ತಮುತ್ತಲಿನ ಜಗತ್ತಿನಲ್ಲಿನ ಅರಾಜಕತೆ, ಹಿಪಾಕ್ರಸಿ, ದಡ್ಡತನಗಳನ್ನು ಸೂಕ್ಷ್ಮವಾಗಿ ಕಂಡು ಮನಃಪೂರ್ವಕವಾಗಿ ನಗುವುದಕ್ಕೆ ಉತೃಷ್ಟವಾದ ಬುದ್ಧಿಮತ್ತೆ ಅತ್ಯವಶ್ಯಕ. ಹೊರಗಿನ ವಸ್ತು, ವ್ಯಕ್ತಿಗಳಿಗೆ ತಾಕಿಸಿದ ವ್ಯಂಗ್ಯ, ಹಾಸ್ಯ, ಲೇವಡಿಯ ಮೊನೆಗೆ ತನ್ನನ್ನು ತಾನೇ ಈಡು ಮಾಡಿಕೊಂಡು ಹೃದಯದಿಂದ ಉಕ್ಕಿ ಬಂದ ನಗೆಯೊಳಕ್ಕೆ ಮುಳುಗಿ ಹೋಗುವುದಕ್ಕೆ ಪರಿಶುದ್ಧವಾದ ಮನಸ್ಸು ಬೇಕು. ಒಂದರಲ್ಲಿ ಬುದ್ಧಿವಂತಿಕೆಯ ಅಹಂ ಹಾಸ್ಯದ ಸಲಕರಣೆಯಾದರೆ ಮತ್ತೊಂದರಲ್ಲಿ ಅಹಂಕಾರ ಮೀರಿದ ವಿನಯ ವಿನೋದದ ತಿರುಳಾಗುತ್ತದೆ.

ಇಂತಹ ಒಂದು ಜೀವನ ದೃಷ್ಟಿಯ, ಚಿಂತನ ಕ್ರಮದ ಅನ್ವೇಷಣೆಯಲ್ಲಿ ಸಾಗುವ ಮಹದಾಸೆಯಿರುವ, ಬುದ್ಧಿವಂತಿಕೆಯನ್ನು ಬಳಸಿ ಬುದ್ಧಿವಂತಿಕೆಯನ್ನೇ ಲೇವಡಿ ಮಾಡುತ್ತಾ ಬುದ್ಧಿವಂತರಾದವರನ್ನು ವ್ಯಂಗ್ಯಕ್ಕೆ ಈಡುಮಾಡಿ ಬುದ್ಧಿವಂತರಾಗುವ ಹುಚ್ಚುತನಕ್ಕೆ ಬೀಳುವ ನಾವುಗಳು ನಗೆಯ ನಗಾರಿಯನ್ನು ಬಾರಿಸುತ್ತಿದ್ದೇವೆ .

ನಮ್ಮ ತಂಡ ಹೀಗಿದೆ:

ಸಾಮ್ರಾಟ್

ಕುಚೇಲ

ಶ್ರೀ ತೊಣಚಪ್ಪ

ಶ್ರೀ ಶ್ರೀ ಶ್ರೀ ಅಧ್ಯಾತ್ಮಾನಂದ

ಕೋಮಲ್

ಈ ನಮ್ಮ ಹುಚ್ಚಾಟದಲ್ಲಿ ಭಾಗಿಯಾಗುವುದಕ್ಕೆ ಆಸಕ್ತಿಯಿದ್ದರೆ ನೀವು ಎರಡು ಕೆಲಸ ಮಾಡಬಹುದು. ನಮ್ಮ ಬ್ಲಾಗಿಗೆ ಚಂದಾದಾರರಾಗಬಹುದು (ಚಂದಾ ಇಲ್ಲದೆ!) ಜೊತೆಗೆ ನಮ್ಮ ತಾಣಕ್ಕೆ ನೀವೂ ಬರೆಯಬಹುದು (ಸಂಭಾವನೆ ಇಲ್ಲದೆ )

ಹೆಚ್ಚಿನ ಮಾಹಿತಿಗಾಗಿ ಸಂಪರ್ಕಿಸಿ: nagesamrat@gmail.com